کراچی:صوبہ سندھ میں آج کرونا وائرس کے مزید 3 مریض جاں بحق ہو گئے ہیں، جبکہ صوبے میں 854 نئے کیسز رپورٹ ہوئے ہیں
تفصیلات کے مطابق وزیراعلیٰ سندھ مراد علی شاہ نے کرونا وائرس کی صورت حال پر اپنے پیغام میں کہا کہ سندھ میں گزشتہ 24 گھنٹوں کے دوران 854 کیسز سامنے آنا تشویش ناک ہے،آج 3 مریض انتقال کر گئے جس کے بعد ہلاکتوں کی تعداد 280 ہوگئی ہیں۔
مراد علی شاہ کا کہنا تھا کہ سندھ میں کرونا سے 136 مریض کی حالت تشویش ناک ہے،29 وینٹی لیٹرز پر ہیں وزیراعلیٰ سندھ کا مزید کہنا تھا کہ آج 280 مزید مریض صحت یاب ہو کر لوٹ گئے۔
پاکستان میں کرونا وائرس کے مریضوں کی تعداد 42,125 ہو گئی
واضح رہے کہ کرونا وائرس کی عالمگیر وبا میں پاکستان کیسز کی تعداد کے لحاظ سے دنیا کا 20 واں ملک بن گیا ہے، اب تک 42,125 کیسز کی تصدیق ہو چکی ہے، یہ وبا اب تک 213 ممالک کو لپیٹ میں لے چکی ہے۔
نیشنل کمانڈ اینڈ آپریشن سینٹر کی جانب سے جاری اَپ ڈیٹ کے مطابق نئے اور مہلک وائرس کو وِڈ نائنٹین کی عالمگیر وبا سے پاکستان بھر میں 42,125 افراد متاثر ہو چکے ہیں، گزشتہ چوبیس گھنٹوں کے دوران مزید 30 افراد جان کی بازی ہار گئے، جس کے بعد اموات کی تعداد 903 ہو گئی ہے۔
