کانپور : کورونا لاک ڈاؤن میں لوگوں کی مشکلات میں اضافہ ہورہا ہے، ٹرانسپورٹ نہ ہونے کی وجہ سے باپ اپنے بیمار بیٹے کو چارپائی پر ڈال کر میلوں دور پیدل چلنے پر مجبور ہوگیا۔
تفصیلات کے مطابق کورونا وائرس کے پھیلاؤ کو روکنے کے لیے ملک گیر سطح پر لاک ڈاؤن نافذ ہے، لاک ڈاؤن کے دوران ملک کی مختلف ریاستوں سے دلوں کو جھنجھوڑنے والے مہاجر مزدوروں کی تصاویر سامنے آرہی ہیں۔
ملک گیر سطح پر جاری لاک ڈاؤن کے دوران مختلف ریاستوں سے مہاجر مزدوروں کا پیدل سفر جاری ہے اور اب تک درجنوں مزدور حادثات کے شکار ہو کر ہلاک ہو چکے ہیں، تاہم مہاجر مزدوروں کا سفر مسلسل جاری ہے۔
اسی ضمن میں لدھیانہ سے چارپائی پر اپنے بیمار بیٹے کو گھر لے جاتے ہوئے تکلیف دہ تصویر بھی سامنے آئی۔ در اصل راج کمار اپنے خاندان کے ساتھ لدھیانہ میں دیہاڑی مزدوری کرتا تھا لیکن لاک ڈاؤن کی وجہ سے انہیں مشکلات کا سامنا تھا،۔
جس کے بعد انہوں نے بیمار بیٹے کے ساتھ اپنے آبائی وطن جانے کا فیصلہ کیا اور 15 دنوں میں800 کلو میٹر کا سفر طے کرکے کانپور پہنچا جہاں پولیس انہیں کھانا کھلایا پھر آگے کے سفر کے لیے انتظام کروایا۔
