کراچی: میئر کراچی وسیم اختر نے سندھ حکومت سے کے ایم سی کے لیے خصوصی گرانٹ کا مطالبہ کر دیا۔
تفصیلات کے مطابق کے ایم سی میں معاشی بحران پر میئر کراچی وسیم اختر نے چیف سیکریٹری سندھ کو خط لکھا ہے جس میں ریٹائر ملازمین کی پنشن ادائیگی کے لیے خصوصی گرانٹ کی درخواست کی گئی ہے۔
وسیم اختر نے چیف سیکریٹری سندھ کو 2015 سے تاحال ریٹائر پنشن سے محروم ملازمین کی سمری ارسال کی ہے۔
میئر کراچی کا کہنا تھا کہ سپریم کورٹ کے حکم کی روشنی میں کے ایم سی کو فنڈ اورگرانٹس دی جائیں،پنشن کی مد میں 3 ارب 43 کروڑ کی ادائیگی کرنی ہے۔
وسیم اختر کا مزید کہنا تھا کہ حکومت کے ایم سی کے معاشی بحران کے مدنظر خصوصی گرانٹ فراہم کرے،کرونا کے باعث ریٹائر ملازمین مشکلات کا شکار ہیں۔
فنڈز کی وجہ سے جون 2018 کے بعد نالے صاف نہیں ہوئے، وسیم اختر
اس سے قبل 8 جولائی کو میئر کراچی وسیم اختر کا کہنا تھا کہ جون 2018 تک تمام نالے صاف کرتے تھے، فنڈز کی وجہ سے جون 2018 کے بعد نالےصاف نہیں ہوئے۔
