سان فرانسسکو: سماجی رابطے کی سب سے بڑی کمپنی فیس بک نے میسنجر کے لیے نئے پرائیوسی فیچر متعارف کرانے کا اعلان کردیا۔
فیس بک کی جانب سے جاری کردہ اعلامیے کے مطابق پرائیوسی فیچرز متعارف کرانے کا مقصد صارفین کو محفوظ ماحول فراہم کرنا اور انہیں زیادہ کنٹرول فراہم کرنا ہے۔
میسنجر ایپ لاک
فیس بک نے صارفین کے لیے میسنجر ایپ کو علیحدہ سے لاک کرنے کا فیچر متعارف کرایا، جس کا مقصد صارف کی چیٹ کو محفوظ بنانا اور دوسروں تک رسائی نہ دینا ہے۔
کمپنی نے میسنجر ایپ میں فیس اور فنگر پرنٹ لاک کا فیچر شامل کرلیا، صارف اپنے موبائل کی پرائیوسی سیٹنگز میں جاکر جس طرح ان لاک کرنے کا انتخاب کریں گے انہیں وہ سہولت دستیاب ہوگی۔
What happens in Messenger, stays in Messenger. Today, we’re rolling out new features like the ability to lock your app. Find out how and more about our other updates here: https://t.co/iLzokZkwYO pic.twitter.com/4JC5JpDbtX
— Messenger (@messenger) July 22, 2020
یہاں یہ بات واضح کرنا ضروری ہے کہ فیس لاک یا فنگر پرنٹس لاک وہ صارفین استعمال کرسکیں گے جن کے موبائل میں پہلے یہ سہولت موجود ہے، یعنی وہ اپنے موبائل کو فیس لاک یا فنگر پرنٹ کی مدد سے ہی ان لاک کرتے ہیں۔
فیس بک ترجمان کے مطابق اس فیچر کا مقصد صارف کے اکاؤنٹ کو تحفظ فراہم کرنا ہے جب کوئی اس کے فون کو استعمال کرے تو میسنجر تک رسائی حاصل نہ کرسکے۔
مزید پڑھیں: فیس بک، واٹس ایپ اور انسٹاگرام میسنجر کو ایک کرنے کی تیاری
فیس بک میسنجر کے اس فیچر کی سہولت فی الوقت آئی او ایس آپریٹنگ سسٹم استعمال کرنے والے صارفین کو دستیاب ہے، آئندہ چند ہفتوں یا مہینوں میں اینڈرائیڈ صارفین کے لیے بھی یہ فیچر متعارف کرایا جائے گا۔
علاوہ ازیں فیس بک نے پرائیوسی سیٹنگز میں ایک نیا سیکشن بھی متعارف کرایا جہاں صارفین آسانی سے ایپ لاک، آئی ڈیز بلاک اور دیگر لوگوں تک آسانی سے رسائی حاصل کرسکیں گے۔
