اسلام آباد: وزیر اعظم عمران خان نے عوام سے شجر کاری مہم کا حصہ بننے کی اپیل کرتے ہوئے کہا ہے کہ ایک دن میں 35 لاکھ پودے لگانے کا ہدف مقرر کیا ہے، کوشش کریں گے کہ ہدف مکمل کرلیں۔
تفصیلات کے مطابق وزیر اعظم عمران خان نے عوام سے کل شجر کاری مہم کا حصہ بننے کی اپیل کرتے ہوئے کہا ہے کہ کل سے ملک بھر میں شجر کاری مہم شروع کر رہے ہیں۔
وزیر اعظم کا کہنا ہے کہ کل ملکی تاریخ کی سب سے بڑی شجر کاری مہم شروع کر رہے ہیں، ارکان اسمبلی، وزرا، وزرائے اعلیٰ اور ٹائیگر فورس رضا کار مہم میں شریک ہوں گے۔
انہوں نے کہا ہے کہ ایک دن میں 35 لاکھ پودے لگانے کا ہدف مقرر کیا ہے، کوشش کریں گے کہ ہدف مکمل کرلیں۔
خیال رہے کہ کل ٹائیگرز فورس ڈے کے موقع پر کراچی سے خیبر تک مون سون کی سب سے بڑی شجر کاری مہم شروع کی جائے گی، حکومتی وزرا ایک دن میں زیادہ سے زیادہ پودے لگانے کا ریکارڈ بنانے کے لیے پرعزم ہیں۔
معاون خصوصی برائے ماحولیات ملک امین اسلم کے مطابق 10 کے بجائے 20 لاکھ پودے لگانے کے انتظامات کر لیے ہیں، مہم بیک وقت چاروں صوبوں کے شہروں سے شروع ہو گی۔
