اسلام آباد : وزیراعظم عمران خان نے پیر سے قومی اسمبلی اورسینیٹ کااجلاس منعقد کرنے کی ہدایت کرتے ہوئے کہا ایف اے ٹی ایف قوانین ہر صورت پاس کرائیں گے۔
تفصیلات کے مطابق وزیراعظم عمران خان سے مشیر پارلیمانی امور ڈاکٹر بابر اعوان کی ملاقات ہوئی ، ملاقات میں اہم آئینی،قانونی اور ملکی امور پر تبادلہ خیال کیا گیا اور ایف اے ٹی ایف سےمتعلق قانون سازی اور پارلیمانی معاملات پرتفصیلی مشاورت کی گئی۔
بابر اعوان نے وزیراعظم کو ایف اے ٹی ایف قانون سازی پربریفنگ دی ، وزیراعظم نے پیر سے قومی اسمبلی اورسینیٹ کااجلاس منعقد کرنے کی ہدایت کردی اور کہا ایف اےٹی ایف قوانین ہر صورت پاس کرائیں گے، ایف اے ٹی ایف قانون کی مخالفت قومی اہداف کی مخالفت ہے۔
بابراعوان نے وزیراعظم کو مختلف وزارتوں کے زیر التوابلز پر بھی بریفنگ دی ، جس پر وزیراعظم نے زیر التوابل فوری پارلیمنٹری افئیرز بھیجنے کی ہدایت کرتے ہوئے کہا ملکی سلامتی اورعوامی مفاد کی قانون سازی میں تاخیرنہیں ہونی چاہیے۔
عمران خان کا کہنا تھا کہ عام آدمی کوریلیف فراہم کرنے کےہرممکن اقدامات کیےجا رہے ہیں، مکمل توجہ معاشی اور سماجی حالات کی بہتری پرمرکوز کر رکھی ہے۔
ڈاکٹر بابر اعوان نے کہا کہ عوامی ریلیف کےحالیہ حکومتی اقدامات کے مثبت نتائج مل رہے ہیں، پیٹرولیم مصنوعات کی قیمتوں میں اضافہ نہ کر کے عوام کو ریلیف دیا گیا، مشکل حالات میں حکومتی تعاون عوام کےلیےاطمینان کا باعث بنے گا۔
