لاہور : وزیرصحت پنجاب ڈاکٹریاسمین نے کہا ہے کہ 10لاکھ سے زائد سرکاری ملازمین کوصحت انصاف کارڈ دیا جائے گا، صحت انصاف کارڈ کے حامل خاندانوں کواسپتالوں میں بہترین علاج کی سہولت دستیاب ہے۔
تفصیلات کے مطابق وزیرصحت پنجاب ڈاکٹریاسمین راشد نے اپنے بیان میں کہا ہے کہ وزیراعظم عمران خان کی ہدایت پر صحت انصاف کارڈ کی صوبہ بھر میں یونیورسل ہیلتھ کوریج کو یقینی بنایا جائے گا جبکہ بیواؤں، زکوۃ حاصل کرنے والے افراد اور سرکاری اسکولوں میں پڑھنے والے بچوں کے خاندانوں کو بھی صحت انصاف کارڈ کی سہولت دینے کیلئے اقدامات اٹھائے جائیں۔
یاسمین راشد کا کہنا تھا کہ پنجاب میں 10لاکھ سے زائد سرکاری ملازمین کو بھی صحت انصاف کارڈ کی سہولت دی جائے گی، صحت انصاف کارڈ کے حامل خاندانوں کو ہسپتالوں میں بہترین علاج کی سہولت دستیاب ہے، پنجا ب کے کارڈیالوجی اسپتالوں میں صحت انصاف کارڈ ہولڈرز علاج کرواسکیں گے۔
صوبائی وزیر نے مزید کہا کہ صحت انصاف کارڈ کے منصوبہ کو عوامی سطح پربہت سراہاجارہاہے، صحت انصاف کارڈ کا دائرہ کاروسیع کرکے 1کروڑ سے زائد خاندانوں کو یونیورسل ہیلتھ کوریج دی جائے گی۔
ان کا کہنا تھا کہ غربت کی سطح سے نیچے خاندانوں کو سہولت دیناوزیراعظم عمران خان کا ویژن ہے۔
