کراچی: مولانا فضل الرحمان نے مطالبہ کیا ہے کہ کیپٹن (ر) محمد صفدر کو فوری طور پر رہا کیاجائے۔
تفصیلات کے مطابق آج کراچی میں پی ڈی ایم رہنماؤں نے کیپٹن محمد صفدر کی گرفتاری پر ردِ عمل میں نیوز کانفرنس کرتے ہوئے مطالبہ کیا ہے کہ پی ڈی ایم رہنما کو فوری طور پر رہا کیا جائے۔
جمعیت علمائے اسلام ف کے رہنما مولانا فضل الرحمان نے کہا کہ صفدر کی گرفتاری کے ذریعے ن لیگ اور پیپلز پارٹی میں بد اعتمادی پیدا کرنے کی کوشش کی گئی ہے لیکن بلاول بھٹو اور آصف زرداری سے بات ہوئی تو انھوں نے اس پر افسوس اور شرمندگی کا اظہار کیا۔
مولانا کا کہنا تھا کہ یہ صرف مریم پر نہیں بلکہ پوری پی ڈی ایم پر حملہ ہے، مریم نواز یہاں آئی ہیں تو پیپلز پارٹی اور ہم میزبان ہیں، جس کی مدعیت میں ایف آئی آر کٹی، وہ مدعی کون ہے ہم عوام کو بتائیں گے۔
مزارقائد کے تقدس کی پامالی سے متعلق کیس :کیپٹن (ر) صفدر کوعدالت میں پیش کردیاگیا
مولانا فضل الرحمان نے کہا پی ڈی ایم رہنما کیپٹن (ر) صفدر کو ہوٹل کے کمرے سے گرفتار کیا گیا، کمرے پر دھاوا بول کر دروازہ توڑا گیا، ان کی گرفتاری قابل مذمت اور شرم ناک ہے، گرفتاری سے متعلق وزیر اعلیٰ سندھ کو بھی لاعلم رکھا گیا۔
انھوں نے کہا کہ یہ کہا جا رہا ہے کہ مزار قائد پر ہلڑ بازی کی گئی، پی ٹی آئی کے کارکنوں کی ہلڑ بازی کا کلپ بھی موجود ہے۔
واضح رہے کہ مزار قائد کے تقدس کی پامالی پر کیپٹن (ر) صفدر کو کراچی پولیس نے گرفتار کر لیا ہے، آج اس کیس میں صفدر کو عدالت میں بھی پیش کیاگیا۔ مریم نواز اور ان کے شوہر کے خلاف تھانہ بریگیڈ میں مقدمہ درج ہے، جس میں مزار قائد کی بے حرمتی، املاک کو نقصان پہنچانے اور دھمکیاں دینے کی دفعات شامل کی گئی ہیں جب کہ اس مقدمے میں 200 نامعلوم افراد بھی نامزد ہیں۔
