امریکا میں ایک اسکول میں ایک نٹ کھٹ ریکون نے ٹیچرز کی دوڑیں لگوا دیں، استاد جانور کو پکڑنے کے لیے آنے والے افسر کے ساتھ مل کر اسے پکڑنے کی کوشش کر رہے ہیں۔
امریکی ریاست ٹیکسس میں ایک ریکون اسکول کے اندر داخل ہوگیا اور ادھر سے ادھر بھاگ دوڑ کرنے لگا۔
انتظامیہ نے اسے پکڑنے کے لیے مدد طلب کی تو ایک اینیمل کنٹرول افسر اسے اسکول سے نکالنے کے لیے پہنچ گیا لیکن شرارتی جانور نے اسے تگنی کا ناچ نچا دیا۔
اسکول کے پرنسپل نے اسکول میں لگے سیکیورٹی کیمرا کی فوٹیج جاری کی جس میں کئی استاد افسر کی مدد کرتے نظر آرہے ہیں۔
ویڈیو میں دیکھا جاسکتا ہے کہ 7 کے قریب ٹیچرز اور کنٹرول افسر ریکون کو پکڑنے کے لیے اسکول کی راہداریوں میں یہاں سے وہاں دوڑ لگا رہے ہیں۔
ریکون کی رفتار بہت تیز ہے اور وہ کسی کے ہاتھ نہیں آرہا۔ پھر آخر وہ خود ہی ایک کھلے دروازے سے باہر نکل گیا۔
اس سے قبل ایک بینک میں بھی 2 ریکون چہل قدمی کرتے پائے گئے تھے جو کسی طرح اندر داخل ہوگئے تھے جنہیں بعد میں سیکیورٹی اہلکاروں نے بڑی مشکل سے باہر نکالا۔
