راولپنڈی : آرمی چیف جنرل قمرجاویدباجوہ نے ایرانی وزیر خارجہ جوادظریف سے ملاقات میں کہا کہ پاک ایران وسیع ترتعاون سے خطے میں امن واستحکام پرمثبت اثرات مرتب ہوں گے۔
پاک فوج کے شعبہ تعلقات عامہ (آئی ایس پی آر) کے مطابق ایرانی وزیر خارجہ جوادظریف نے جی ایچ کیوکا دورہ کیا اور آرمی چیف جنرل قمر جاوید باجوہ سے ملاقات کی ، جس میں دوستانہ تعلقات، ہمسائیگی سےمتعلق امورپرتبادلہ خیال کیا گیا۔
آئی ایس پی آر کے مطابق ملاقات میں سرحدی اور دفاعی امور، امن اور علاقائی سلامتی کے امور سمیت افغان مفاہمتی عمل اور پاک ایران بارڈرمنیجمنٹ پر گفتگو ہوئی۔
اس موقع پر آرمی چیف جنرل قمرجاوید باجوہ نے کہا پاک ایران وسیع ترتعاون سےخطےمیں امن واستحکام پرمثبت اثرات مرتب ہوں گے۔
ایرانی وزیرخارجہ کا کہنا تھا کہ خطےمیں امن واستحکام میں پاکستان کاکردارلائق تحسین ہے، باالخصوص افغان امن عمل میں پاکستان کا کردار لائق تحسین ہے۔
مزید پڑھیں : ایرانی وزیرخارجہ جواد ظریف پاکستان پہنچ گئے
یاد رہے گذشتہ روز ایران کے وزیر خارجہ دو روزہ سرکاری دورے پر پاکستان پہنچے تھے ، نور خان ایئربیس پر ایڈیشنل سیکریٹری اے آئی ٹی ، ایرانی سفیر سید محمد حسینی نے معزز مہمان کا استقبال کیا۔
سفارتی ذرائع کا کہنا تھا کہ ایرانی وزیرخارجہ کے ہمراہ اعلیٰ سطح کا سیاسی واقتصادی وفد بھی اسلام آباد پہنچا جبکہ ایران کے نمائندہ خصوصی برائےافغانستان محمدابراہیم طاہریان بھی وفد میں شامل ہیں۔
ترجمان دفترخارجہ کے مطابق ایرانی وزیر خارجہ دورہ پاکستان میں صدر عارف علوی،وزیر اعظم عمران خان سے ملاقاتیں کریں گے، اس کے علاوہ وزیرخارجہ شاہ محمود سے وفود کی سطح پر مذاکرات بھی کریں گے۔
