اسلام آباد: عمرہ زائرین سے متعلق سعودی حکومت اور پاکستانی ٹریول ایجنسیز کے درمیان نیا معاہدہ تیار کرلیا گیا۔
اے آر وائی نیوز کی رپورٹ کے مطابق سعودی حکومت اور پاکستانی ٹریول ایجنسیز کے درمیان نیا معاہدہ تیار کیا گیا ہے جس کے تحت زائرین کو عمرے پر گروپ کی شکل میں لے جایا جائے گا۔
ذرائع کے مطابق 50 سے زائد کمپنیوں کے ساتھ عمرہ سے متعلق معاہدہ ہوگا، معاہدے کو 15 دسمبر تک حتمی شکل دی جائے گی۔
ذرائع کا کہنا ہے کہ نئے معاہدے کے مطابق ہر گروپ 22 زائرین پر مشتمل ہوگا، عمرہ زائرین مکمل طور پر سعودی حکومت کے ایس او پیز پر عمل کریں گے۔
مزید پڑھیں:عمرہ زائرین کے لیے بڑی خوش خبری، سعودی عرب نے اجازت دے دی
عمرہ زائرین کو گروپوں میں عمرے کی ادائیگی کے لیے لے کر جانے کے لیے منصوبہ بندی مکمل کرلی گئی ہے۔
واضح رہے کہ 6 نومبر کو سعودی عرب نے تمام ایئرلائنز کو عمرہ زائرین اور وزٹ ویزا کے مسافروں کو مملکت لانے کی اجازت دی تھی۔
یاد رہے کہ سعودی عرب نے یکم نومبر سے بیرون ملک کے زائرین کے لیے عمرہ کھولنے کا اعلان کیا تھا، جس کے بعد انڈونیشیا اور پاکستان سے عازمین کا پہلا دستہ یکم نومبر کو ہی جدہ اور مدینہ ایئرپورٹ پہنچا تھا۔
