اسلام آباد: وزیراعظم نے وفاقی کابینہ میں اہم اور بڑی تبدیلیاں کرتے ہوئے متعدد وفاقی وزرا کے قلمدان کو تبدیل کردیا ہے۔
تفصیلات کے مطابق شیخ رشید احمد کو وزارت داخلہ کا قلمدان سونپ دیاگیا ہے، اعظم خان سواتی کو وزارت ریلوے کا قلمدان دے دیا گیا ہے۔
اسی طرح آج ہی وفاقی وزیر کا حلف اٹھانے والے ڈاکٹر عبدالحفیظ شیخ کو وزیر خزانہ کا قلمدان سونپ دیا گیا ہے، سابق وزیر داخلہ بریگیڈیئر(ر)اعجاز احمد شاہ نارکوٹس کنٹرول کے وزیر ہوں گے۔وفاقی وزرا کے قلمدان تبدیل کئے جانے کا نوٹیفکیشن جاری کردیا گیا ہے۔
بعد ازاں وزیراعظم عمران خان سے شیخ رشید نے وزیراعظم ہاؤس میں ملاقات کی، ملاقات میں ملکی سیاسی صورتحال پرتبادلہ خیال کیا گیا، اس موقع پر وزیراعظم نے شیخ رشید کو خود ذمہ داریوں سے آگاہ کیا۔
Federal Minister @ShkhRasheed calls on Prime Minister @ImranKhanPTI in Islamabad. pic.twitter.com/nW48AN8Gcx
— PTI (@PTIofficial) December 11, 2020
اہم ملاقات میں وزیراعظم نے نئے وزیر داخلہ شیخ رشید کو ہدایت کی کہ آپ نے قانون پر عمل درآمد کرواناہے اور عوام کی توقعات پرپورا اترنا ہے، یہ پاکستان کیلئے آزمائش کا وقت ہے۔
اس سے قبل سابق وزیر داخلہ اعجاز شاہ نے بھی وزیراعظم سے ملاقات کی تھی، ملاقات میں وزیراعظم نے قلمدان تبدیل کرنے کے حوالے سےاعجازشاہ کو اعتماد لیا۔
Federal Minister Ijaz Ahmed Shah calls on Prime Minister @ImranKhanPTI #PrimeMinisterImranKhan pic.twitter.com/tCT36GJLgA
— PTI (@PTIofficial) December 11, 2020
وزیر اعظم سے ملاقات کے بعد وزیر داخلہ شیخ رشید کی جانب سے جاری بیان میں کہا گیا کہ و زیراعظم نے مزید بھی اہم ذمہ داریاں دی ہیں، دعا کریں اللہ تعالیٰ ذمہ داریاں نبھانے کی توفیق دے، انشااللہ عمران خان جیتے گا اور قوم کو اعتماد میں لےگا۔
شیخ رشید کا کہنا تھا کہ اپوزیشن جمہوریت کو زندہ رکھے،کرونا سے لوگوں کو بچائے، اپوزیشن افراتفری میں قوم کو نہ دھکیلے۔
دوسری جانب ذرائع کا کہنا ہے کہ شیخ رشید نےآج اہم پریس کانفرنس طلب کرلی ہے، شیخ رشید بطور وزیرداخلہ شام پانچ بجے پریس کانفرنس کریں گے۔