اسلام آباد: وزیر اعظم عمران خان نے کہا ہے کہ اعشاریے ثابت کرتے ہیں ادارے آزاد ہوں تو بہتر احتساب ہوتا ہے، اور سیاسی مداخلت کے بغیر آزادانہ کام کی اجازت ہو تو قوم کو فائدہ ہوتا ہے۔
اے آر وائی نیوز کے مطابق آج وزیر اعظم پاکستان کی زیر صدارت پارٹی ترجمانوں اور حکومتی رہنماؤں کا اجلاس منعقد ہوا، جس میں وزیر اعظم نے ایک بار پھر اس نکتے پر زور دیا کہ اپوزیشن کی تحریک این آر او کے لیے ہے اور حکومت کو پی ڈی ایم تحریک سے کوئی خطرہ نہیں۔
انھوں نے کہا کوئی بھی معاشرہ احتساب کے بغیر آگے نہیں بڑھ سکتا، کچھ بھی ہو جائے احتساب کا عمل جاری رہے گا، سیاسی مداخلت کے بغیر آزادانہ کام کی اجازت ہو تو قوم کو فائدہ ہوتا ہے، نیب نے ہمارے دور میں 389 ارب روپے کی وصولی کی، پنجاب اینٹی کرپشن نے ہماری حکومت میں 206 ارب ریکور کیے۔
ذرایع کا کہنا ہے کہ اجلاس میں وزیر اعظم عمران خان نے اپوزیشن کو ٹف ٹائم دینے کی ہدایت کی، سینیٹ اجلاس اور انتخابات میں اپوزیشن کو بھرپور جواب دینے پر اجلاس میں اتفاق کیا گیا۔
وزیر اعظم نے کہا اپوزیشن نے کرونا وبا میں عوام کی زندگی سے کھیلنے کی کوشش کی، اپوزیشن کا احتساب شروع ہوا تو سب اکٹھے ہو گئے ہیں، ماضی کی حکومتیں قومی خزانے کو لوٹتی رہیں۔
انھوں نے مزید کہا حکومت ترقی کی طرف گامزن ہے، کم زور معیشت کو درست ٹریک پر لگا دیا ہے، تمام معاشی اعشاریے درست سمت میں ہیں، نئے سال میں کارکردگی مزید بہتر کرنے اور ڈیلیوری پر توجہ ہوگی۔
