نئی دہلی: بھارت میں ایک خاتون موبائل فون پر بات کرتے ہوئے 30 فٹ کی اونچائی سے نیچے گر گئیں، پولیس نے لاش اسپتال منتقل کر کے واقعے کی تفتیش شروع کردی۔
یہ واقعہ بھارتی ریاست ہریانہ میں پیش آیا جہاں ایک نوجوان خاتون موبائل سے ویڈیو کال کرتے ہوئے ریلوے اسٹیشن کے سامنے جی ٹی روڈ پر پل سے نیچے گر پڑی۔ تقریباً 30 فٹ کی اونچائی سے گرنے کے بعد خاتون کی موت واقع ہوگئی۔
خاتون کے موبائل اور بیگ سے ملے کارڈز سے ان کی شناخت انجلی رانی کے نام سے ہوئی، موبائل سے ملنے والے نمبروں کے ذریعے پولیس نے خاتون کے اہلخانہ کو بھی اطلاع دے دی۔
عینی شاہدین کا کہنا ہے کہ خاتون ریلوے اسٹیشن چوک پر جی ٹی روڈ پر پل کے اوپر کھڑی تھیں، ان کے ہاتھ میں موبائل تھا اور وہ ویڈیو بنا رہی تھیں۔ اسی وقت خاتون پل سے نیچے گریں، ان کے سر پر چوٹ لگی اور وہ موقع پر ہی دم توڑ گئی۔
بعض افراد نے ان کا موبائل بھی اٹھا لیا جو ان کے قریب ہی گرا جسے بعد میں پولیس کے حوالے کردیا گیا۔ پولیس نے موبائل سے کال کیے جانے والے آخری نمبر پر بھی فون کیا اور مذکورہ شخص کو تھانے طلب کرلیا۔
پولیس نے لاش کو اسپتال منتقل کر کے واقعے کی تفتیش شروع کردی ہے۔
