ریاض: سعودی عرب کے شہر بللسمر میں 25 سال بعد برفباری ہوئی جس نے مقامی شہریوں کو خوشگوار حیرت میں مبتلا کردیا، مرکز موسمیات نے مزید برفباری کی پیشنگوئی کی ہے۔
سعودی ویب سائٹ کے مطابق عسیر ریجن کی کمشنری بللسمر میں نصف صدی کے بعد زبردست برفباری ہوئی ہے۔ یہ علاقہ سعودی عرب کے جنوب مغرب میں واقع ہے۔
برفباری سے مقامی شہریوں اور مقیم غیر ملکیوں میں خوشی اور حیرت کی لہر دوڑ گئی، برفباری سے کھیتوں اور زرعی فارمز کے مناظر نہایت دلکش ہوگئے۔
بللسمر کے باشندو ں نے برفبای کے مناظر کی تصاویر اور ویڈیوز سوشل میڈیا پر شیئر کی ہیں، موسمیات کے ماہرین اور بزرگوں کا کہنا ہے کہ یہ اپنی نوعیت کا منفرد واقعہ ہے۔
بللسمر کا علاقہ سطح سمندر سے 3 ہزار میٹر کی بلندی پر واقع ہے، برفباری کے بعد یہاں درجہ حرارت میں کمی واقع ہوگئی ہے۔
ماہر موسمیات سمیر الاسمری کا کہنا ہے کہ پیر کی صبح برفباری ہوئی جس سے درجہ حرارت منفی ہوگیا، یہاں 50 برس میں پہلی بار یہ منظر دیکھنے کو ملا ہے۔ شہر میں تقریباً ایک ہفتے سے روزانہ بارش ہو رہی ہے۔ یہاں کا مطلع اکثر ابر آلود رہتا ہے۔
انہوں نے کہا کہ بللسمر اور عسیر کے بیشتر علاقوں کا موسم ان دنوں غیر مستحکم ہے، یہاں درجہ حرارت منفی تک پہنچا ہوا ہے اسی وجہ سے برفباری بھی ہوئی۔
قومی مرکز برائے موسمیات نے امکان ظاہر کیا ہے کہ عسیر ریجن میں گرج چمک کے ساتھ بارش بھی ہونے والی ہے اور یہاں مزید برفباری ہوگی۔
فلکیات کی عرب تنظیم کے رکن ڈاکٹر خالد الزعاق نے بتایا کہ موسم سرما کا دوسرا حصہ شروع ہوگیا ہے اور اس دوران سخت سردی پڑے گی۔ یہ موسم 26 دن جاری رہے گا۔
