کراچی: شہر قائد کے علاقے گارڈن میں گزشتہ دنوں فائرنگ کرکے ٹک ٹاکر مسکان کو تین ساتھیوں سمیت قتل کردیا گیا تھا، مقتولہ اور ان کے ساتھیوں کے قتل کی وجہ سامنے آگئی۔
اے آر وای نیوز کی رپورٹ کے مطابق پولیس ذرائع کا کہنا ہے کہ ٹک ٹاکر مسکان اور سویرا کے درمیان جھگڑا چل رہا تھا، دونوں ٹک ٹاکر خواتین میں جھگڑا چار لوگوں کی موت کی وجہ بنا۔
پولیس کے مطابق ٹک ٹاک اسٹار مسکان قاتل رحمان کی دوست تھی، مسکان سے جھگڑے کے بعد رحمان نے سویرا نامی ٹک ٹاکر سے دوستی کرکے ویڈیو بنائی جسے دیکھنے پر مسکان سویرا کے گھر پہنچ گئی۔
پولیس ذرائع کا کہنا ہے کہ دونوں خواتین کے درمیان جھگڑا ہوا، ملزم رحمان نے سویرا کی شکایت پر مسکان کو بلا کر ساتھیوں سمیت گولیاں مار دیں۔
مزید پڑھیں: گارڈن فائرنگ، مقتولہ مسکان کی رحمان افغانی کے ہمراہ کئی ویڈیوز سامنے آگئیں
واضح رہے کہ گزشتہ دنوں کراچی کے علاقے گارڈن میں ٹک ٹاکر مسکان کو تین ساتھیوں سمیت قتل کردیا گیا تھا، پولیس تحقیقات میں انکشاف ہوا تھا کہ قتل ہونے والے مقتولین میں سے تین خود بھی جرائم پیشہ نکلے تھے جبکہ مقتولہ مسکان کا تعلق بھی مبینہ طور پر منشیات فروشوں سے نکلا تھا۔
پولیس کا کہنا تھا کہ مقتولہ مسکان کی ملزم رحمان افغانی کے ہمراہ کئی ویڈیوز سامنے آگئیں، پولیس کا کہنا ہے کہ رحمان عرف افغانی نے مسکان کے لیے گلشن معمار میں پارٹی کا انتظام کیا تھا، پارٹی میں کئی ٹک ٹاکرز کو دعوت دی گئی تھی۔
پولیس کے مطابق رحمان افغانی ٹک ٹاکر مسکان کو پیسے بھی دیا کرتا تھا، رحمان رات میں مسکان کو مردوں کے ساتھ گھومنے سے منع کرتا تھا، مقتول عامر سے رحمان کا قتل سے چند روز قبل جھگڑا بھی ہوا تھا۔
