کراچی: شہر قائد کے علاقے طارق روڈ پر نجی بینک سے رقم لے کر نکلنے والے شہری کو ڈاکوؤں نے لوٹ لیا۔
اے آر وائی نیوز کی رپورٹ کے مطابق کراچی کے علاقے طارق روڈ پر نجی بینک سے نکلنے والے شہری کو لوٹ لیا گیا، شہری نے 20 لاکھ روپے کیش کروائے تھے، ملزمان رقم لوٹ کر باآسانی فرار ہوگئے۔
واقعے کی سی سی ٹی وی فوٹیج منظر عام پر آگئی ہے جس میں دیکھا جاسکتا ہے کہ موٹر سائیکل پر سوار دو ڈاکو کار سوار کا تعاقب کرتے ہوئے آئے اور ایک شخص گاڑی سے اترا تو ایک ڈاکو نے اسے زمین پر بٹھا دیا، ڈاکو نے گاڑی میں بیٹھ کر متاثرہ شخص سے رقم لی اور فرار ہوگئے۔
متاثرہ شہری کا کہنا ہے کہ مسلح ڈکیت جاتے جاتے لائسنس یافتہ اسلحہ بھی لے گئے۔
ذرائع کے مطابق ڈاکوؤں نے شہری کو گھر کے دروازے پر لوٹا، ملزمان جانتے تھے کہ متاثرہ شہری کے پاس لائسنس یافتہ اسلحہ موجود ہے۔
واضح رہے کہ کراچی میں بینک سے رقم لے کر نکلنے والے شہریوں سے لوٹ مار کے واقعات میں اضافہ ہوگیا، گزشتہ سال نومبر میں کراچی کے علاقے ابو الحسن اصفہانی روڈ پر بینک سے رقم لے کر نکلنے والے شہری کو لوٹ لیا گیا تھا۔
واقعے کی سی سی ٹی وی فوٹیج منظرعام پر آئی تھی جس میں دیکھا گیا کہ ملزمان نے ہیلمٹ پہن رکھا تھا جبکہ تیسرے ملزم کا چہرہ واضح تھا۔
پولیس کا کہنا تھا کہ واقعے کا مقدمہ درج کرلیا گیا ہے، ملزمان کی تلاش جاری ہے۔
