گونا : عورت ذات کی اس قدر تضحیک شاید ہی کسی اور معاشرے میں کی جاتی ہو جتنی کہ بھارت میں کی جاتی ہے، خواتین کے ساتھ جنسی زیادتی اور گھریلو تشدد کے سنگین واقعات آئے دن میڈیا کی خبروں میں نظر آتے ہیں۔
ایک ایسا ہی واقعہ بھارت کی ریاست مدھیا پردیش کے علاقے گونا میں بھی دیکھنے میں آیا جہاں ایک عورت کو اس بے دردی کے ساتھ بے عزت کیا گیا کہ وہاں موجود لوگ اپنی اس حرکت پر فخریہ انداز میں مسکراتے ہوئے اس دل دہلا دینے والے منظر سے لطف اندوز ہورہے ہیں۔
اس مجبور خاتون کا جرم یہ تھا کہ اس نے اپنے شوہر سے علیحدگی اختیار کرلی تھی اور اس علیحدگی میں اس کے شوہر کی مرضی بھی شامل تھی جسے اس کے سسرال والوں نے اپنی انا کا مسئلہ بنالیا تھا۔
اس حوالے سے بھارتی میڈیا کے مطابق خاتون پر جبر کرکے اسے مجبور کیا گیا کہ وہ شوہر کے اہلخانہ کو اپنے کندھے پر اٹھا کر تین کلومیٹر تک چلے۔ افسوس ناک بات یہ بھی تھی کہ مجمع میں موجود کئی افراد خاتون کے پیچھے ڈنڈے اور کرکٹ بیٹ لے کر چلتے رہے۔
A married tribal woman in Guna was beaten up, shamed and forced to carry her relatives on her shoulders as punishment @ndtv @ndtvindia @NCWIndia @sharmarekha @ChouhanShivraj @drnarottammisra @OfficeOfKNath @manishndtv @GargiRawat @vinodkapri @rohini_sgh pic.twitter.com/H8ZJL8m86g
— Anurag Dwary (@Anurag_Dwary) February 15, 2021
واقعے کی وڈیو سوشل میڈیا پر بہت تیزی سے وائرل ہو رہی ہے جس میں دیکھا جاسکتا ہے کہ درمیانی عمر کی خاتون کے کندھے پر ایک نوجوان لڑکے کو بٹھا کر پیدل چلایا جارہا ہے اور ساتھ موجود لوگ اسے آہستہ چلنے پر مارتے ہیں اور اس کی تکلیف پر شور مچاتے اور ہنسی مذاق کرتے رہے۔
سوشل میڈیا پر ویڈیو وائرل ہونے کے بعد پولیس نے واقعے کا نوٹس لیا اور کارروائی کرتے ہوئے مقدمہ درج کرکے چار افراد کو حراست میں لے لیا گیا۔
مذکورہ خاتون کی شکایت کے مطابق اس نے باہمی رضامندی سے اپنے شوہر سے علیحدگی اختیار کرلی تھی۔گزشتہ ہفتے اس کے سابقہ شوہر کے گھر والے اور دیگر کچھ لوگ اس کے گھر آئے اور اسے اغوا کرلیا جس کے بعد اسے یہ سب کرنے پر مجبور کیا گیا۔
واضح رہے کہ اس سے قبل بھی بھارت کی اسی ریاست میں گزشتہ سال جولائی اور اس کے علاوہ 2 سال قبل اپریل میں اسی طرح کے واقعات پیش آئے تھے۔