ماسکو : عالمی وبا کورونا وائرس سے متعلق روس کے سائنسدان نے دعویٰ کیا ہے کہ یہ وبا ایک سے سال میں اپنی شدت کو کم کردے گی اور اس کی کیفیت ایک موسمی بیماری جیسی ہوگی۔
تفصیلات کے مطابق روسی سنٹرل سائنسی تحقیقاتی انسٹیٹیوٹ آف ایپیڈیمولوجی میں کلینیکل اور تجزیاتی کام کی ڈپٹی ڈائریکٹر نتالیہ سینیچنایا نے بتایا ہے کہ کورونا وائرس کا انفیکشن ایک یا دو سال میں ایک موسمی بیماری بن سکتا ہے۔
ان کا کہنا تھا کہ شاید اگلے ایک سے دو سال میں یہ بیماری موسمی زکام میں تبدیل ہو سکتی ہے۔ انہوں نے وضاحت دیتے ہوئے کہا کہ کورونا وائرس نے اب کسی موسمی بیماری کے آثار دکھانا شروع کردیئے ہیں جبکہ2020 کے موسم خزاں میں کورونا انفیکشن میں اضافہ اس کا ثبوت ہوسکتا ہے۔
روسی ماہر کے مطابق موسمی امراض کے معاملات عام طور پر موسم خزاں اور بہار کے موسم میں بڑھ جاتے ہیں لہٰذا ان موسموں کے دوران کوویڈ 19کے مریضوں کی تعداد بھی بڑھ سکتی ہے۔ جس سے پتا چلتا ہے کہ یہ آئندہ ایک موسمی بیماری بن کر رہ جائے گی۔
