پشاور: خیبرپختونخواہ اسمبلی میں سینیٹ ووٹنگ کے دوران موبائل فون کے استعمال کا انکشاف ہوا ہے۔
نمائندہ اے آر وائی نیوز کی رپورٹ کے مطابق خیبرپختونخواہ اسمبلی میں پولنگ کے دوران تحریک انصاف سے تعلق رکھنے والی خاتون رکن اسمبلی نے ووٹ دینے کے بعد بیلٹ پیپر کی تصویر بنائی اور یہ امیدوار کو واٹس ایپ پر بھیجی۔
خاتون رکن اسمبلی نے ٹیکنوکریٹ کی نشست پر لڑنے والے امیدوار کو تصویر کے ساتھ مبارک باد کا پیغام بھی بھیجا۔
مزید پڑھیں: سینیٹ الیکشن میں بڑا اپ سیٹ، قومی اسمبلی سےیوسف رضاگیلانی کامیاب
واضح رہے کہ ملک کی تمام صوبائی اسمبلیوں میں سینیٹ کے لیے ووٹنگ کی گئی جس میں تمام اراکین اسمبلی نے حصہ لیا۔ الیکشن کمیشن کے قواعد و ضوابط کے مطابق پولنگ بوتھ میں حق رائے دہی کے دوران موبائل فون استعمال کرنے پر پابندی عائد کی تھی۔
یاد رہے کہ خیبرپختونخواہ اسمبلی میں آج سینیٹ کی 12 نشستوں پر ووٹنگ ہوئی تھی، جس میں سے 7 جرنل، 2 ٹیکنوکریٹ، 2 خواتین اور ایک مخصوص نشست شامل تھی۔
سینیٹ ووٹنگ کا عمل ختم ہونے کے بعد اب گنتی اور غیر حتمی، غیرسرکاری نتائج آنے کا سلسلہ جاری ہے۔
