قاہرہ : شوہر نے بیوی کو کھانا وقت پر نہ بنانے پر بے دردی سے قتل کردیا، ہلاک ہونے والی خاتون امید سے تھی، پولیس نے ملزم کو گرفتار کرکے عدالت میں پیش کردیا۔
تفصیلات کے مطابق مصر کے دارالحکومت قاہرہ میں ایک ہولناک واقعہ پیش آیا ہے جہاں معمولی سی بات پر شوہر نے طیش میں آکر بیوی کو قتل کرڈالا۔
غیرملکی میڈیا کے مطابق قتل کی یہ واردات یہ واقعہ قاہرہ کے معروف محلے شبرا الخیمہ میں کی گئی۔ گیس کا چولہا لگنے سے خاتون کی موت واقع ہوگئی۔
ملزم شوہر نے بیوی سے کھانا تیار کرنے کے لیے کہا تھا اور اس کی جانب سے معذرت کرنے پر آگ بگولہ ہوگیا اور گیس کا چولہا اٹھا کر اس کے سر پر دے مارا جس سے وہ موقع پر ہی جاں بحق ہوگئی۔
ذرائع کے مطابق ہلاک ہونے والی خاتون امید سے تھی۔ بعد ازاں پولیس نے ملزم کو گرفتار کرکے تھانے منتقل کیا اور ابتدائی تفتیش کے بعد عدالت میں پیش کردیا۔
پبلک پراسیکیوشن نے شوہر کو پوچھ گچھ کے لیے چار روزہ ریمانڈ پر حراست میں لے لیا، پبلک پراسیکیوشن نے لاش کے پوسٹ مارٹم کی رپورٹ بھی طلب کرلی اور خفیہ سروس کے اہلکاروں کو واقعے کی تحقیقات کی ہدایت کردی ہے۔
واضح رہے کہ مصر میں معاشی مسائل کی وجہ سے ان دنوں غریب طبقے میں گھریلو مسائل بڑھتے جارہے ہیں۔ اطلاعات کے مطابق واردات کرنے والا بھی ایک مزدور تھا اور اس کے ہاتھوں قتل ہونے والی اس کی بیوی گھریلو خاتون تھی۔
