کابل: افغان صدر اشرف غنی نے ایران کو تیل کے بدلے پانی فراہم کرنے کی پیشکش کردی۔
غیرملکی خبررساں ادارے کی رپورٹ کے مطابق افغان صدر اشرف غنی کا کہنا ہے کہ آج کے بعد ہم ایران کو تیل کے بدلے پانی دیں گے، چار سال قبل 48 ملین ڈالر کی لاگت سے تیار ہونے والے ڈیم سے کسی پڑوسی ملک کے مفادات کو نقصان نہیں پہنچا ہے۔
افغان صدر نے ضلع نیمرز میں کمال خان ڈیم کا افتتاح کرتے ہوئے کہا کہ صدیوں سے ہلمند کا پانی افغانستان سے نکلتا ہے مگر آج افغانیوں نے اسے اپنے مقصد کے لیے استعمال کرنا شروع کیا ہے، ایران اور افغانستان پانی کے مسئلے پر طے پائے معاہدے کے تحت بھی ہم اس پانی کو استعمال کرنے کا حق رکھتے ہیں۔
واضح رہے کہ ایران اور افغانستان کے درمیان کئی تنازعات اور حل طلب مسائل میں پانی کا مسئلہ بھی شامل ہے، دونوں ممالک ایک دوسرے پر آبی وسائل پر قبضے کا الزام عائد کرتے ہیں۔
افغان صدر نے کمال خان ڈیم کا افتتاح ایسے وقت میں کیا ہے جب دوسری طرف تہران اور کابل کے درمیان آبی وسائل کا تنازع شدت اختیار کرگیا ہے۔
خیال رہے کہ ایران اور افغانستان کے درمیان کئی دریاؤں کے پانی پر دعوے کیے جاتے ہیں۔
ایران سے نکلنے والے متعدد دریا عراق میں گرتے ہیں یہی وجہ ہے کہ تہران اور بغداد کے درمیان بھی تنازع موجود ہے، اسی طرح افغانستان سے پھوٹنے والے دریا ایران میں گرتے ہیں اور ان دونوں پڑوسی ملکوں کے درمیان بھی تنازعات ہیں۔
