دبئی: پاکستان نے ایک بار پھر بھارت کو مذاکرات کی پیش کش کی ہے، تاہم بات چیت کے لیے مقبوضہ کشمیر کی 5 اگست 2019 سے پہلے والی حیثیت بحال کرنے کا مطالبہ بھی کیا گیا ہے۔
تفصیلات کے مطابق پاکستان نے ایک بار پھر بھارت کو مشروط مذاکرات کی پیش کی ہے، تاہم وزیر خارجہ پاکستان نے دبئی میں مذاکرات کے سلسلے میں کسی ملاقات کی واضح طور پر تردید کر دی ہے۔
دبئی میں پریس کانفرنس کرتے ہوئے وزیر خارجہ شاہ محمود قریشی نے کہا کہ وہ بھارت کے ساتھ مذاکرات کے لیے دبئی نہیں آئے، انھوں نے کہا یہ تاثر دیا جا رہا ہے کہ شاید پاکستان اور بھارت کے درمیان کوئی خفیہ ملاقات ہو رہی ہے، لیکن ایسی کوئی ملاقات طے تھی نہ ہو رہی ہے۔
انھوں نے کہا پاکستان کبھی مذاکرات سے پیچھے نہیں ہٹا، اگر بھارت اگر مقبوضہ کشمیر پر پانچ اگست والے اقدامات پر نظر ثانی کر لے تو مذاکرات کو آگے بڑھانے میں کوئی قباحت نہیں، پاکستان ہمیشہ میز پر آنے کے لیے تیار ہے۔
شاہ محمود کا کہنا تھا کہ پاکستان بھارت سمیت اپنے تمام ہمسایوں کے ساتھ اچھے تعلقات کا خواہاں رہا ہے۔
