کراچی کے علاقے گلشن اقبال میں ملزم خاتون سے کار چھین کر باآسانی فرار ہوگیا۔
اے آر وائی نیوز کی رپورٹ کے مطابق کراچی کے علاقے گلشن اقبال مسکن چورنگی کے قریب ملزم خاتون سے کار چھین کر فرار ہوگیا، واقعے کی ویڈیو منظر عام پر آگئی۔
ویڈیو میں دیکھا جاسکتا ہے کہ خاتون گاڑی میں بیٹھی ہوئی تھیں ملزم چلتا ہوا آیا اور گاڑی میں بیٹھ گیا، خاتون ملزم کو دیکھ کر اسٹارٹ گاڑی میں سے اتر گئیں۔
والدہ کے ساتھ واردات ہوتا دیکھ کر دکان کے اندر موجود شوہر اور بیٹا بھاگتے ہوئے آئے اور ملزم کو روکنے کی کوشش کی لیکن خاتون نے دونوں کو روک دیا۔
ویڈیو میں دیکھا جاسکتا ہے کہ ملزم گاڑی لے کر باآسانی فرار ہوگیا۔
متاثرہ فیملی کی جانب سے تھانے میں درخواست دائر کردی گئی ہے، پولیس گاڑی میں لگے ٹریکر کی مدد سے ملزم کی تلاش کررہی ہے، آخری اطلاعات آنے تک گاڑی برآمد نہیں ہوسکی اور نہ ہی ملزم پولیس کی گرفت میں آیا۔
