ایمسٹرڈیم: یورپین میڈیسن ایجنسی (EMA) نے کرونا ویکسین اسٹور کرنے کی مدت میں توسیع کی منظوری دے دی۔
تفصیلات کے مطابق پیر کو یورپ کے سرکاری ڈرگ ریگولیٹر نے کہا ہے کہ فائزر اینڈ بائیو این ٹیک کی کو وِڈ 19 ویکسین عام فریج یا درجہ حرارت پر 31 دن تک اسٹور کی جا سکتی ہے، اس سے قبل یہ مدت صرف 5 دن تھی۔
ادویات کے یورپی نگران ادارے کا کہنا ہے کہ اس اقدام سے اب خطے میں ویکسین کی ترسیل کے دوران لاجسٹک مشکلات کو کم کیا جا سکے گا، ایجنسی کا کہنا ہے کہ ویکسین تیار کرنے والی کمپنی کی طرف سے فراہم کردہ اضافی ڈیٹا کا جائزہ لینے کے بعد اس تبدیلی کی منظوری دی گئی ہے۔
بائیو این ٹیک نے ایک بیان میں کہا ہے کہ ویکسین کو اسٹور کرنے کی شرائط میں تبدیلی اس کی پائیداری کے جائزے کے نئے اعداد و شمار کی بنیاد پر کی گئی ہے، جن میں پراڈکٹ کے 31 روز تک معیاری ہونے کی تصدیق کی گئی ہے۔
توقع ہے کہ اس تبدیلی سے یورپی یونین کو ویکسین کے ٹیکے لگانے کے پروگرام کو تقویت دینے میں مدد ملے گی، یورپی یونین اپنے 70 فی صد بالغ شہریوں کو موسم گرما تک ویکسین کے ٹیکے لگانے کا ارادہ رکھتی ہے، فی الحال ان شہریوں کے 36 فی صد حصے کو ویکسین کا کم سے کم ایک ٹیکہ لگایا جا چکا ہے۔
یاد رہے کہ پہلے یہ ہدایت کی گئی تھی کہ ویکسین کو 70 اور 80 سیلسئس کے درمیان انتہائی کم درجہ حرارت پر رکھنا ضروری ہے، اور استعمال سے صرف چند ہی دن قبل ویکسین کو معیاری میڈیکل فریج میں منتقل کیا جا سکتا تھا۔
ای ایم اے کا کہنا ہے کہ انھوں نے فریج میں 2 اور 8 سیلسئس کے درمیان ویکسین کی بند شیشی رکھنے کی مدت پانچ دن سے بڑھا کر ایک ماہ کرنے کی منظوری دے دی ہے۔
