جیکب آباد: وفاقی وزیر برائے منصوبہ بندی اسد عمر کا کہنا ہے کہ سندھ حکومت نے پانی جمع کرنے کے لیے کونسے منصوبے لگائے، پانی کی کمی تو ہے ارسا والے اس کا جواب دے چکے ہیں۔
اے آر وائی نیوز کے مطابق وفاقی وزیر برائے منصوبہ بندی اسد عمر نے جیکب آباد میں میڈیا سے گفتگو کرتے ہوئے کہا کہ سندھ عوام وزیراعظم کی طرف ویسے ہی دیکھتی ہے جیسے پاکستانی عوام دیکھتی ہے، خوف، ڈرا دھمکا کر ووٹ لینے والوں سے ان کی امیدیں نہیں ہیں۔
اسد عمر نے کہا کہ سندھ کے عوام کی امیدیں وزیراعظم عمران خان سے ہیں، عمران خان انصاف کا مشن لے کر نکلے ہیں، انشا اللہ یہ مشن پورا کریں گے۔
وفاقی وزیر نے کہا کہ ہمیں بڑی سنجیدگی سے رینجرز آپریشن کے بارے میں سوچنا چاہیے، سندھ کے عوام کے جان و مال کی حفاظت کے لیے وفاق کو کچھ کرنا چاہیے، سندھ کے عوام ڈاکوؤں کے ہاتھوں حفاظت نہ ہو یہ بھی وفاق ہوتا نہیں دیکھ سکتا۔
اسد عمر نے کہا کہ بلاول زرداری کو بھی کبھی کبھی سندھ یاد آتا ہے، اس میں کوئی شک نہیں کہ دنیا میں پانی کم ہورہا ہے، کیا پیپلزپارٹی بتاسکتی ہے سندھ میں پانی کی کونسی اسکیمیں بنائیں۔
انہوں نے کہا کہ یہ بھی بتائیں کہ سندھ میں پانی کی وارا بندی پیسے دے کر کیوں کی جارہی ہے، پانی کی کمی پر ارسا جواب دے چکا ہے یہ صوبوں کو آپس میں لڑانے کی بات ہے۔
