کراچی میں غیراعلانیہ لوڈشیڈنگ اور بجلی کی بلاتعطل فراہمی کے لیے وفاقی حکومت نے کے الیکٹرک کو 400 میگاواٹ اضافی بجلی فراہم کرنے کا اعلان کر دیا۔
تفصیلات کے مطابق وزیر اعظم کی خصوصی ہدایت پر گورنر سندھ عمران اسماعیل نے کراچی شہر میں جاری طویل اور غیر اعلانیہ لوڈشیڈنگ کے معاملے پر وفاقی وزیر برائے توانائی محمد حماد اظہر سےاسلام آباد میں ملاقات کی۔
ملاقات میں وفاقی سیکریٹری توانائی اور وفاقی سیکریٹری فنانس نے بھی شرکت کی جب کہ ایم ڈی مونس علوی بھی موجود تھے۔
گورنر سندھ نے کہا کہ کے ای کراچی کو بلا تعطل بجلی فراہمی کو یقینی بنائے، کے الیکٹرک کو وارننگ بھی جاری کی گئی ہے کہ کراچی کے لوگ اگر بجلی کے حوالے سے مزید تنگ اور پریشان ہوئے تو وفاق اس معاملہ میں انتہائی اقدامات کر سکتا ہے۔
ملاقات کے حوالے سے گورنر سندھ نے بیان میں بتایا کہ وفاقی وزیر برائے توانائی محمد حماد اظہر کی جانب سے کے الیکٹرک کو مزید 400 میگا واٹ اضافی بجلی فراہم کرنے کا فیصلہ کیا گیا ہے۔
گورنر سندھ نے کہا کہ اگلے دس دن تک بلاتعطل بجلی کی فراہمی کے معاملات کو درست کرنے کے لئے ہدایات بھی جاری کی گئی ہیں۔