اگر آپ پارکنگ ایریا میں گاڑی صحیح پارک کریں لیکن کچھ دیر بعد گاڑی کنویں میں ڈوبی ہوئی ملے تو آپ کا ردعمل کیا ہوگا، ایسا ہی ایک واقعہ ممبئی میں پیش آیا جہاں زمین پر کھڑی گاڑی اچانک کنویں میں ڈوب گئی۔
غیر ملکی خبر رساں ادارے کی رپورٹ کے مطابق بھارتی ریاست مہاراشٹرا کے شہر ممبئی میں کھڑی گاڑی اچانک سڑک میں دھنسنے کے حیران کن واقعے نے دیکھنے والوں کو خوفزدہ کردیا کہ آخر کس طرح اتنی بڑی گاڑی اچانک کنویں میں ڈوب گئی۔
گاڑی زمین کے نیچے کنویں میں ڈوبنے کی ویڈیو سماجی رابطے کی ویب سائٹ پر ٹوئٹر پر تیزی سے وائرل ہورہی ہے۔
سوشل میڈیا پر شیئر ہونے والی ویڈیو میں دیکھا جاسکتا ہے کہ گاڑی کا اگلا حصہ مکمل طور پر زمین میں دھنس چکا ہے اور پھر آہستہ آہستہ پوری گاڑی زمین کے نیچے پانی میں ڈوب گئی۔
A car sinking in a sinkhole in Mumbai's Ghatkopar
Acoording to Traffic Police, "There was a well at the place. Some people covered it with concrete slab & started parking cars over it. Incident occurred due to land subsidence following rain. No one injured". pic.twitter.com/q3VOidlHya
— Alter Ego (@Alter_Ego45) June 13, 2021
بھارتی حکام کا کہنا ہے کہ ممبئی کے علاقے گھاٹکوپر میں سوسائٹی نے رہائشیوں کی گاڑیاں کھڑی کرنے کےلیے کنویں کے اوپر سلیب رکھ کر بند کرکے اسے پارکنگ ایریا بنادیا تھا۔
ممبئی میں ہونے والی مون سون بارشوں کے سبب کنویں پر رکھا سلیب ٹوٹ گیا اور اوپر کھڑی گاڑی اچانک پانی میں ڈوب گئی۔
بھارتی میڈیا کا کہنا ہے کہ پنکج مہتا نامی شخص کی ملکیت تھی، جو سوسائٹی کا رہائشی تھا، ذرائع ابلاغ کا کہنا ہے کہ خوش قسمتی سے خوفناک حادثے میں کوئی جانی نقصان نہیں ہوا۔
