اسلام آباد: سابق وزیر کی جانب سے نیب سکھر ٹیم پر حملے پر چیئرمین نیب نے نوٹس لے لیا ہے۔
نیب کی جانب سے جاری اعلامیے میں کہا گیا کہ نیب ٹیم اعجاز جاکھرانی کےگھر وارنٹ کی تکمیل کرنے گئی تھی، نیب ٹیم کے ہمراہ خاتون رکن بھی تھیں، نیب ٹیم نے سابق صوبائی وزیر کو گرفتار کرنے کی کوشش کی تو وہاں موجود افراد نے ٹیم کو گھیرے میں لے لیا۔
نیب اعلامیے کے مطابق اعجاز جاکھرانی کے لوگوں نے نیب ٹیم پر حملہ کیا اور تشدد کا نشانہ بنایا جس کے باعث سابق صوبائی وزیر کی گرفتاری عمل میں نہ لائی جاسکی۔
نیب اعلامیے کے مطابق نیب سکھر کی ٹیم محکمہ ایجوکیشن ورکس میں فنڈز کے خورد برد کی تحقیقات کر رہی ہے۔
دوسری جانب سکھر کی احتساب عدالت میں آمدن سے زائد اثاثہ جات کیس میں اعجازجاکھرانی پر دائر دو ریفرنسز کی سماعت ہوئی، اعجاز جاکھرانی کے وکیل عدالت میں پیش ہوئے، تاہم عدالت نے سماعت انیس جولائی تک ملتوی کردی۔
نیب کے مطابق مشیرِ جیل خانہ جات اعجاز جاکھرانی کے خلاف تین انکوائریاں جاری ہیں، ان کے خلاف سکھر میں ایک ریفرنس بھی دائر ہو چکا ہے۔
واضح رہے کہ سندھ ہائی کورٹ نے آمدن سے زائد اثاثے بنانے اور اختیارات کے ناجائز استعمال سے متعلق نیب تحقیقات کے الزام میں مشیرِ جیل خانہ جات اعجاز جاکھرانی کو ضمانت دی رکھی ہے۔
