اسلام آباد: نوری آباد پاور پلانٹ ریفرنس میں وزیراعلیٰ سندھ کو ریلیف مل گیا۔
تفصیلات کے مطابق احتساب عدالت اسلام آباد میں وزیراعلیٰ سندھ مراد علی شاہ کے خلاف نوری آباد پاور پلانٹ ریفرنس کی سماعت ہوئی، احتساب عدالت کے جج اصغر علی نے ریفرنس کی سماعت کی۔
سماعت کے موقع پر وزیراعلیٰ سندھ سید مراد علی عدالتی حکم کی تعمیل کرتے ہوئے عدالت میں پیش ہوئے، آج کیس میں نامزد ملزمان پر فرد جرم عائد کرنا تھی تاہم عدالت نے عدالت نے مراد علی شاہ اور دیگر ملزمان پر فرد جرم کی کارروائی موخر کردی۔
عدالت حکم نامے میں کہا گیا کہ ریفرنس کے ملزمان پر فرد جرم اب 28 جولائی کو عائد کی جائے گی، اس موقع پر تمام ملزمان کمرہ عدالت میں موجود ہونگے۔
واضح رہے کہ نیب نے وزیراعلیٰ سندھ مراد علی شاہ کیخلاف ریفرنس دائر کیا تھا، نیب ریفرنس میں وزیراعلیٰ سندھ کے خلاف توانائی منصوبوں پر خلاف ضابطہ فنڈز جاری کرنے اور سندھ میں توانائی منصوبوں میں اختیارات کے غلط استعمال کا الزام عائد کیا گیا ہے۔
