کراچی: سول ایوی ایشن اتھارٹی (سی اے اے) نے عالمی پروازوں کے حوالے سے ٹریول ایڈوائزری جاری کردی۔
اے آر وائی نیوز کے مطابق ترجمان سول ایوی ایشن اتھارٹی کا کہنا ہے کہ 80 فیصد عالمی پروازوں پر پابندی برقرار رہے گی، پابندی 15 جولائی تک نافذ العمل رہے گی۔
سی اے اے حکام کے مطابق برطانیہ، کینیڈا، یورپ، ملائیشیا اور چین سے 40 فیصد پروازوں کے آنے کی اجازت ہوگی۔
ترجمان سی اے اے کا کہنا ہے کہ پروازوں کی اچانک منسوخی سے سی اے اے کا کوئی تعلق نہیں ہے، بعض بین الاقوامی ایئرلائنز نے اوور بکنگ کررکھی تھی۔
مزید پڑھیں: نیا سفری ہدایت نامہ جاری، پابندیاں برقرار
واضح رہے کہ گزشتہ روز سول ایوی ایشن اتھارٹی نےنیا سفری ہدایت نامہ جاری کیا تھا جس کے مطابق کیٹیگری سی کے مسافروں پر پاکستان آنے کی پابندی کو برقرار رکھا گیا تھا۔
البتہ کیٹیگری سی ممالک سے پاکستانی شہریت والوں کو آنےکی اجازت ہو گی اور ان ممالک سے آنے والوں کو 72 گھنٹےقبل کورونا ٹیسٹ کرانا لازمی ہو گا۔ ان مسافروں کا پاکستان کے ایئرپورٹس پر ریپڈ اینٹیجن ٹیسٹ بھی کیا جائےگا۔
بھارت، بنگلادیش، انڈونیشیا سمیت 26 ملکوں کو کیٹیگری سی میں رکھا گیا تھا۔ سی اےاے کے شعبہ ایئرٹرانسپورٹ نے نوٹیفکیشن جاری کر دیا تھا۔
سی اےاے کی نئی ٹریول ایڈوائزری 15 جولائی تک نافذ العمل ہو گی۔
