سکھر: صوبہ سندھ میں انسانیت کی خدمت کرنے والے بھی محفوظ نہ رہ سکے، نامعلوم ملزمان نے میت منتقل کرنے والی ایمبولینس اور اس کے ڈرائیور کو اغوا کرلیا ہے۔
ایدھی ترجمان کی جانب سے جاری بیان میں بتایا گیا ہے کہ گذشتہ روز لاڑکانہ سے ٹھری میر واہ میت پہنچانے والے ڈرائیور عمران ماچھی کو نامعلوم ملزمان نے گاڑی سمیت اغوا کرلیا ہے۔
فلاحی ادارے لاڑکانہ کے ترجمان کا کہنا ہے کہ ڈرائیور ایمبولینس سمیت رات سے غائب ہے، واقعے سے متعلق لاڑکانہ اور خیرپور پولیس کو اطلاع دے دی گئی ہے، مغوی کی بازیابی میں تاحال پیشرفت نہیں ہوئی ہے، وزیراعلیٰ سندھ سے بھی اپیل کرتے ہیں کہ فوری طور پر اغوا کئے گئے ڈرائیور کو بحفاظت بازیاب کرائیں۔
دوسری جانب ایس ایس پی خیرپور نے دعویٰ کیا ہے کہ ایدھی ڈرائیور کو اغوا کرنیوالےملزمان مغوی کے ورثا کو فون کیا ہے اور مطالبہ کیا کہ پہلے ہمارے بندے چھوڑے جائیں۔
ایس ایس پی خیرپور ظفر اقبال کا موقف ہے کہ ایسا کوئی ملزم گرفتار نہیں جس کا ڈاکو مطالبہ کریں، اغواکاروں کی تلاش کا عمل جاری ہے، کوشش ہے کہ ڈرائیور کو ایمبولینس سمیت بازیاب کرایاجائے۔
