ابوظبی: ابوظبی نے آنے والے شہریوں اور رہائشیوں کے لیے سفری طریقہ کار اپ ڈیٹ کر دیا ہے۔
تفصیلات کے مطابق ابوظبی ایمرجنسی، کرائسز اینڈ ڈیزاسٹر سے متعلق کمیٹی نے بیرون ملک سفر سے واپس آنے والے ابوظبی کے شہریوں اور رہائشیوں کے لیے سفری طریقہ کار اپ ڈیٹ کر دیا ہے، جو پیر 5 جولائی 2021 سے لاگو ہوگا۔
اپ ڈیٹ کے مطابق گرین لسٹ ممالک سے آنے والے ایسے مسافروں کو قرنطینہ کی ضرورت نہیں ہوگی، جو ویکسینیشن کرا چکے ہیں، تاہم انھیں چھٹے دن پی سی آر ٹیسٹ کرانا ہوگا۔
دیگر مقامات سے پہنچے والے مسافروں کو لازمی طور پر آمد کے ساتھ پی سی آر ٹیسٹ دینے کے ساتھ 7 دن کا قرنطینہ کرنا ہوگا۔
اپ ڈیٹ کے مطابق اس پروٹوکول کا اطلاق متحدہ عرب امارات کے شہریوں اور رہائشیوں پر ہوتا ہے، جنھوں نے کم از کم 28 دن قبل دوسری ویکسن لگوائی ہو، اور یہ الحسن ایپ پر رجسٹرڈ ہو۔
گرین لسٹ والے مقامات سے ابوظبی پہنچنے والے ایسے شہریوں اور رہائشیوں، جنھوں نے ویکسین نہیں لگوائی ہے، کو آمد پر قرنطینہ کے بغیر پی سی آر ٹیسٹ لازمی طور پر کروانا ہوگا۔
جب کہ دوسرے مقامات سے بغیر ویکسینیشن پہنچنے والوں کو آمد پر پی سی آر ٹیسٹ لازمی طور پر دینے کے ساتھ، 12 دن کے لیے قرنطینہ سے بھی گزرنا ہوگا، اور 11 دن کے بعد ان کا دوسرا پی سی آر ٹیسٹ ہوگا۔
