اسلام آباد: وزیر اعظم کے کامیاب جوان پروگرام کے ذریعے قرضوں کی تقسیم کا عمل مزید تیز ہوگیا، منصوبے کے تحت نوجوانوں میں 15 ارب روپے کی تقسیم کا عمل مکمل کردیا گیا۔
تفصیلات کے مطابق حکومت نے کامیاب جوان پروگرام کے تحت 13 ہزار 200 نوجوانوں کو ذاتی روزگار فراہم کردیا۔ وزیر اعظم عمران خان کے معاون خصوصی عثمان ڈار نے سماجی رابطے کی ویب سائٹ ٹویٹر پر کامیاب جوان کے تحت قرض پانے والے نوجوان کی ویڈیو شیئر کی۔
اٹک کا رہائشی سجاد الرحمٰن اپنا روزگار حاصل کرنے میں کامیاب ہوگیا، سجاد کا کہنا تھا کہ اردو ادب میں ماسٹرز ڈگری ہونے کے باوجود وہ 10 سال تک بے روزگار رہا۔
حکومت نے کامیاب جوان پروگرام کے ذریعے 13 ہزار 2 سو نوجوانوں کو ذاتی روزگار فراہم کر دیا ہے جس کیلئے 15ارب روپے کی تقسیم کا عمل مکمل کیا گیا ہے! نوجوانوں کو یقین ہو رہا ہے کہ عمران خان جیسا لیڈر ہو تو وہ مایوس نہیں ہوں گے، دیکھئیے 10 سال بعد روزگار حاصل کرنے والے نوجوان کے تاثرات! pic.twitter.com/Cs5Jk0r9iJ
— Usman Dar (@UdarOfficial) July 10, 2021
سجاد کا کہنا تھا کہ میرا خواب تھا کہ اپنا کاروبار کروں مگر وسائل کی کمی بڑی رکاوٹ بنی رہی، کامیاب جوان پروگرام میں قرض کے لیے اپلائی کیا تو بینک سے رقم مل گئی۔ آج کامیابی سے بڑے پیمانے پر بزنس کر رہا ہوں۔
انہوں نے کہا کہ عمران خان جیسا لیڈر ہو تو نوجوان مایوس نہیں ہوں گے۔
عثمان ڈار نے سجاد کو کامیاب کاروبار پر مبارکباد دیتے ہوئے کہا کہ 13 ہزار سےزائد نوجوانوں کو ذاتی روزگار کی فراہمی اہم سنگ میل ہے۔ کم از کم 1 لاکھ افراد براہ راست حکومتی منصوبے سے مستفید ہو چکے ہیں۔
انہوں نے کہا کہ وزیر خزانہ شوکت ترین نے منصوبے کو تیز کرنے کے لیے اقدامات کیے ہیں، بینکوں کی جانب سے زبردست تعاون پر خصوصی خراج تحسین پیش کرتا ہوں۔