جیکب آباد: سندھ کے شہر جیکب آباد میں خاتون کے ہاں دو جڑے ہوئے بچوں کی پیدائش ہوئی ہے۔
اے آر وائی نیوز کے مطابق جیکب آباد کے سول اسپتال میں خاتون کے ہاں دو جڑے ہوئے بچوں کی پیدائش ہوئی ہے، گاؤں محمد علی بروہی کی رہائشی خاتون کو زچگی کے لیے سول اسپتال لایا گیا تھا۔
ڈاکٹر شازیہ کا کہنا ہے کہ جڑے ہوئے دونوں بچے ماں کے پیٹ میں مرچکے تھے، دونوں بچوں کے دو بازو، چار ٹانگیں اور دو سر ہیں۔
انہوں نے بتایا کہ دونوں بچوں کو مردہ حالت میں آپریشن کے ذریعے نکالا گیا، آپریشن کرکے خاتون کی زندگی بچالی گئی ہے۔
مزید پڑھیں: دھڑ جڑے بچوں کو نئی زندگی مل گئی
واضح رہے کہ گزشتہ ماہ سعودی ڈاکٹرز کے بروقت اقدام نے دھڑ جڑے بچوں کی زندگی بچالی تھی۔
عرب میڈیا کے مطابق محکمہ صحت سعودی عرب کا کہنا تھا کہ مکہ معظمہ کے ایک نجی اسپتال میں دھڑ جڑے بچوں کو لایا گیا تھا جو زندگی اور موت کی کشمکش میں مبتلا تھے تاہم فوری طبی امداد کی فراہمی کے بعد بچوں کی نئی زندگی مل گئی۔
محکمہ صحت حکام کے مطابق نے بتایا کہ بچوں کے سینے اور پیٹ آپس میں جڑے ہوئے تھے، ان کے سر اور ٹانگیں الگ ہیں جبکہ بازو تین ہیں۔
