بیجنگ:چین نے کرونا قسم ڈیلٹا وائرس سے نمٹنے کے لئے حکمت عملی تیار کرلی ہے۔
میڈیا رپورٹ کے مطابق چین نے وائرس کی مقامی منتقلی کے کیسز کو لگام ڈالنے کی کوششیں کررہا ہے، کرونا کی نئی قسم سے نبرد آزما ہونے کے لئے اسپتالوں میں بھی ہنگامی بنیادوں کے تحت پلان تشکیل دے دیا گیا ہے۔
ریاستی کونسل کی انٹر ایجنسی ٹاسک فورس کی جانب سے جاری کی گئی گائیڈ لائن میں کہا گیا ہے کہ نوول کرونا وائرس کیسز کے علاج کیلئے مختص ہسپتالوں میں انفیکشنز پر قابو پانے کیلئے سخت اقدامات کیے جائیں۔
دستاویز میں کہا گیا کہ بغیر علامات والے کیسز کے ساتھ ساتھ درآمدی اور مقامی منتقلی کے تمام نوول کرونا وائرس کیسز کو مختص اسپتالوں کی قرنطینہ وارڈز میں داخل اور دیگر بیماریوں میں مبتلا مریضوں سے علیحدہ رکھا جانا چاہیئے۔
قرنطینہ وارڈز میں کام کرنیوالے عملہ کا اپنے کام کی جگہ پر داخل ہونے سے قبل مکمل ویکسی نیشن کرانا لازمی ہے، مزید کہا کہ عملہ کو بھی الگ تھلگ رکھنے کیلئے انتظامات کیے جائیں۔
یہ بھی پڑھیں: ووہان شہر میں ایک بار پھر کرونا کا خطرہ منڈلانے لگا، طبی ماہرین کا بڑا فیصلہ
واضح رہے کہ گذشتہ ہفتے ڈیلٹا وائرس کے بڑھتے وار کے باعث ووہان شہر کی پوری آبادی کے کرونا ٹیسٹ کرنے کا فیصلہ کیا گیا تھا، ووہان میں ماس کرونا ٹیسٹنگ کا فیصلے کی بڑی وجہ کرونا کے سات کیسز رپورٹ ہونا تھے۔
حکام کے مطابق ووہان میں باہر سے کام کے لئے آنے والے مزدوروں میں کرونا کے یہ کیسز دریافت ہوئے، جس کے باعث گذشتہ ایک سال کے دوران مقامی سطح پر کرونا کیسز آنے کا سلسلہ ٹوٹا۔
حکام نے کرونا کیسز کے بڑھنے پر موسم گرما کی تعطیلات کے دوران سیاحوں کو بیجنگ میں داخلے سے بھی روک دیا ہے اور شہریوں کو گھروں میں رہنے کی ہدایت کی گئی ہے۔
