دوشنبے: وزیر خارجہ شاہ محمود قریشی تاجکستان کے دارالحکومت دو شنبے پہنچ گئے، وہ تاجکستان، ازبکستان، ترکمانسستان اور ایران کے 2 روزہ دورے پر ہیں۔
تفصیلات کے مطابق وزیر خارجہ شاہ محمود قریشی علیٰ الصبح تاجکستان کے دارالحکومت دو شنبے پہنچ گئے، وزیر خارجہ 4 ملکی دورے کے پہلے مرحلے میں مصروف دن گزاریں گے۔
بعد ازاں شاہ محمود قریشی تاجکستان کی وزارت خارجہ پہنچے، اس موقع پر نمائندہ خصوصی برائے افغانستان اور تاجکستان میں پاکستان کے سفیر بھی ان کے ہمراہ تھے۔
وزیر خارجہ تاجک ہم منصب سراج الدین سے ملاقات کریں گے، بعد ازاں وہ تاجک صدر امام علی رحمٰن سے ملاقات کے لیے صدارتی محل جائیں گے۔
وزیر خارجہ دوپہر کے بعد ازبک دارالحکومت تاشقند کے لیے روانہ ہوں گے، وزیر خارجہ تاشقند میں ازبک ہم منصب اور ازبک صدر سے ملاقاتیں کریں گے۔
اگلے روز وزیر خارجہ ترکمانستان اور ایران بھی جائیں گے جہاں ان کی اہم ملاقاتیں ہوں گی، ان کا یہ دورہ افغانستان کی بدلتی ہوئی صورتحال کے تناظر میں ہے۔
وزیر خارجہ کا دورہ علاقائی ممالک کے ساتھ متفقہ اور مربوط لائحہ عمل اپنانے کی کوششوں کا حصہ ہے۔
