لاہور : پاکستانی شہری نے دنیا کا سب سے چھوٹا ویکیوم کلینر بنا کرعالمی ریکارڈ بنا لیا، انہوں نے پینسل کی مدد سے ویکیوم کلینر بنا کر گینیز بک آف ورلڈ ریکارڈ میں جگہ بنا لی۔
پاکستانی گینیز ورلڈ ریکارڈ ہولڈر احسن قیوم ایک بار پھر گینیز ورلڈ ریکارڈ ہولڈر بن گئے ہیں۔ انہوں نے پینسل سے دنیا کا سب سے چھوٹا ویکیوم کلینر بنایا ہے جس کا سائز 13 ملی میٹر ہے اور یہ چھوٹے ذرات کو اپنے اندر کھینچ لیتا ہے۔
اے آر وائی نیوز کے پروگرام باخبر سویرا میں احسن قیوم کو مدعو کیا گیا انہوں نے ناظرین کو اپنے اس کارنامے سے متعلق تفصیلی طور پر آگاہ کیا۔
انہوں نے بتایا کہ سال 2015سے منی ایچر آرٹ پر کام کررہا ہوں اسی حوالے سے میں نے منی ویکیوم کلینر بنایا ہے جس کی لمبائی 1.3سینٹی میٹر ہے۔
احسن قیوم نے بتایا کہ یہ ریکارڈ انہوں نے تین بار تین بھارتی گینیز ریکارڈ ہولڈرز کے ریکارڈ توڑ کر بنایا ہے۔ قیوم کے مطابق انہوں نے پنسل کی لکڑی کو اندر سے تراشا اور اس کے اندر مشین لگائی۔
ان کا کہنا تھا کہ یہ ویکیوم کلینر مکمل طور پر آپریشنل ہے اور ایک برقی طاقت سے چلنے والا آلہ ہے جو اندرونی دباؤ کے نتیجے میں سکشن کے ذریعے دھول اور ذرات کھینچ لیتا ہے۔
