متحدہ عرب امارات کے دارالحکومت ابوظہبی کی سرکاری ایئرلائن اتحاد ایئرویز نے اپنے مسافروں کو زبردست خوشخبری سنا دی۔
خلیجی میڈیا کے مطابق اتحادایئرویز نے اپنے مسافروں کو ایکسپو 2020 کی ٹکٹیں مفت فراہم کرنے کا اعلان کر دیا۔
اتحادایئرویز کے ذریعے ابوظہبی آنے والے یا بذریعہ ابوظہبی سفر کرنے والوں کو دبئی ایکسپو 2020 کی ٹکٹیں مفت دی جائیں گے۔
پریس ریلیز میں کہا گیا ہے کہ ایکسپو 2020 کے لیے آنے والے سیاح ابوظہبی اور ملک کے دیگر مقامات کا دورہ بھی کر سکتے ہیں یہ خصوصی پروموشن 23 ستمبر سے شروع ہوگی اور 31 مارچ 2022 تک جاری رہے گی۔
واضح رہے کہ دبئی ایکسپو دنیا کا پہلا اتنا بڑا ایونٹ ہے جو یکم اکتوبر 2021 سے 31 مارچ 2022 تک جاری رہے گا۔
ایکسپو دبئی 2020 پہلی بار مشرق وسطیٰ افریقہ اور جنوبی ایشیا کے علاقے میں منعقد ہورہی ہے، یہ عرب دنیا میں اپنی نوعیت کا سب سے بڑا ایونٹ ہے جس میں 192 ممالک کے علاوہ بین الاقوامی کمپنیاں، تنظیمیں اور اکیڈمیز شریک ہوں گی۔
