واشنگٹن: امریکا میں اسرائیل کے آئرن ڈوم کے لیے 1 ارب ڈالر کی منظوری بھاری اکثریت سے دے دی گئی۔
تفصیلات کے مطابق امریکی ایوان نمائندگان نے اسرائیل کو آئرن ڈوم میزائل ڈیفنس سسٹم کو جدید بنانے کے لیے ایک ارب ڈالر فراہم کیے جانے کے حق میں ووٹ دیا ہے۔
دو ہی دن قبل کانگریس میں اسرائیل کے متنازع آئرن ڈون کی فنڈنگ کے حوالے سے اعتراضات اٹھائے جانے کے بعد بل کو بھاری اکثریت سے آخر کار منظور کر لیا گیا۔
ایوان نمائندگان میں بل کے حق میں 420 اور مخالفت میں 9 ووٹ ڈالے گئے، بل کے مخالفین میں 8 ڈیموکریٹس اور 1 ریپبلکن شامل ہیں، اس موقع پر 2 ارکان غیر حاضر رہے۔
اس وسیع منظوری کے بعد بل سینیٹ کو بھیج دیا گیا ہے، سینیٹ میں رائے شماری کی تاریخ کا ابھی اعلان نہیں کیا گیا ہے، تاہم چند لبرل ڈیموکریٹس کی جانب سے بل کی ایک شق کو ویٹو کیا گیا ہے اور کہا گیا ہے کہ اگروہ شق بل میں شامل کی گئی تو وہ بل کے خلاف ووٹ دیں گے۔
اسرائیلی وزیر اعظم نفتالی بینیٹ نے امریکی ایوان نمائندگان، ڈیموکریٹس اور ری پبلیکنز کے تمام اراکین کا شکریہ ادا کیا ہے۔ خیال رہے کہ انسانی حقوق سے متعلق اداروں کے دباؤ پر کانگریس کے بعض اراکین نے اسرائیل کو آئرن ڈوم کی مدد میں دی جانے والی رقوم پر تحفظات کا اظہار کیا تھا۔
انسانی حقوق کی تنظیموں کا کہنا تھا کہ اسرائیل نے رواں سال مئی میں فلسطین کے علاقے غزہ کی پٹی پر بدترین بمباری کی تھی جس کے نتیجے میں عام شہریوں کی اموات ہوئی تھیں۔ فنڈنگ کی مخالف ڈیموکریٹس ارکان میں رشیدہ طلیب نے گفتگو کے دوران کہا کہ ہمیں فلسطینیوں کو اسرائیلی حملوں سے محفوظ رکھنے کی ضرورت کے بارے میں بھی بات کرنی ہے۔
