وائٹ ہاؤس کی ترجمان جین ساکی بھی کرونا وائرس میں مبتلا ہوگئیں، ترجمان وائٹ ہاؤس نے خود مہلک وائرس سے متاثر ہونے کی تصدیق کی۔
غیر ملکی میڈیا کے مطابق جین ساکی نے اپنے ایک بیان میں تصدیق کی کہ اتوار کو ان کا کرونا وائرس کا ٹیسٹ مثبت آیا ہے جس کے بعد وہ اگلے دس روز تک خود کو قرنطینہ کریں گی اور گھر سے ہی کام کریں گی۔
ترجمان وائٹ ہاؤس نے بتایا کہ ان کے اہل خانہ کرونا میں مبتلا ہوئے تھے جس کے بعد انہوں نے کئی مرتبہ ٹیسٹ کروایا لیکن وہ منفی آیا اس کے باوجود وہ صدر بائیڈن کے ساتھ یورپ جانے سے انکاری رہیں۔
انہوں نے بتایا کہ ان میں کرونا وائرس کی ہلکی علامات ہیں، جس کی بڑی وجہ مکمل ویکسینیشن کروانا ہے۔
جین ساکی کا کہنا تھا کہ ان کی صدر بائیڈن سے آخری ملاقات گزشتہ منگل کو ہوئی تھی اور ہمارے درمیان چھ فٹ کا فاصلہ تھا اور ہم نے ماسک بھی پہن رکھے تھے جب کہ ان دنوں وائٹ ہاؤس کے عملے کے سینئیر ممبروں کے ساتھ ذاتی طور پر قریبی رابطہ میں نہیں رہا۔
خیال رہے کہ صدر جوبائیڈن آج گلاسکو میں موسمیاتی تبدیلی سے متعلق جی 20 ممالک سربراہی اجلاس میں شرکت کریں گے جب کہ گزشتہ روز وہ روم میں جی 20 ممالک کے سربراہی اجلاس میں شریک تھے۔
