لاہور : تحریک لبیک پاکستان (ٹی ایل پی ) نے وزیر آباد سے دھرنا ختم کر نے کا اعلان کردیا ، رکن مجلس شوریٰ پیر سرور شاہ نے کہا تحریک لبیک نے 50فیصدمعاہدہ پوراہونےپر دھرنا ختم کیا۔
تفصیلات کے مطابق رکن مجلس شوریٰ تحریک لبیک پاکستان پیرسرور شاہ نے وزیر آباد سے دھرنا ختم کر نے کا اعلان کرتے ہوئے کہا تمام کارکنان وزیر آباد سے واپس لاہور جامع مسجد رحمۃ اللعالمین جائیں۔
پیر سرور شاہ کا کہنا تھا کہ تحریک لبیک نے 50فیصدمعاہدہ پوراہونےپر دھرنا ختم کیا ، ہم معاہدے پر قائم ہیں ، حکومت مقررہ مدت میں تحریک لبیک کیساتھ کیا گیا معاہدہ مکمل کرے۔
رکن مجلس شوریٰ نے کہا کہ مفتی منیب نے گارنٹی دی تھی کہ پچاس فیصد معاملات حل ہوجائیں تو دھرنا اٹھاکر مسجد رحمت اللعالمین لے جائیں گے، جہاں علامہ خادم رضوی کے عرس میں سعد رضوی شامل ہوں گے۔
دوسری جانب ترجمان پنجاب حکومت حسان خاور کا کہنا ہے کہ تحریک لبیک پاکستان سے معاملہ مذاکرات کے ذریعے حل کرلیا ہے، کوشش ہے یہ حل مستقل بنیادوں پر رہے۔
خیال رہے تحریک لبیک پاکستان کے کارکن کا 11 روز سے وزیر آباد میں دھرنا جاری تھا ، جس کے باعث وزیرآباد میں انٹرنیٹ سروس کئی روز سے معطل ہونے سے بینکوں میں بھی کام ٹھپ ہوگیا تھا جبکہ بندشوں اور رکاوٹوں سے شہری رل گئے اور چناب ٹول پلازہ پر ٹریفک جام ہونے سے لاہور جانے والے مسافر بھی پھنس کر رہ گئے۔
یاد رہے گذشتہ روز وزارت داخلہ نے تحریک لبیک پر سے پابندی ہٹانے کا نوٹی فکیشن جاری کیا تھا ، نوٹی فکیشن کے مطابق تحریک لبیک کوکالعدم تنظیموں کی فہرست سے نکال دیا گیا ہے، وفاقی کابینہ کی منظوری کے بعد سمری وزارت داخلہ کوموصول ہوئی تھی جبکہ پنجاب کابینہ نے بھی تحریک لبیک کا نام کالعدم لسٹ سے نکالنے کی سفارش کی تھی۔
