جمال خاشقجی کی منگیتر خدیجہ چنگیز نے کینیڈین گلوکار جسٹن بیبر سے مطالبہ کیا ہے کہ وہ جمال خاشقجی کے قاتلوں کے لیے کنسرٹ نہ کریں۔
تفصیلات کے مطابق مقتول سعودی صحافی جمال خاشقجی کی منگیتر خدیجہ چنگیز نے جسٹن بیبر کے نام ایک کھلا خط لکھا ہے، جس میں انھوں نے مطالبہ کیا کہ سعودی عرب میں اپنا کنسرٹ منسوخ کر دیں۔
خدیجہ نے لکھا کہ آپ کو دنیا کو ایک واضح پیغام دینا چاہیے کہ آپ کا نام، ٹیلنٹ اور آپ کی موسیقی ایسے ملک کے لیے نہیں ہے جہاں ناقدین کا قتل ہو۔
واضح رہے کہ سعودی عرب کے شہر جدہ میں جسٹن بیبر کا میوزک کنسرٹ 5 دسمبر کو منعقد ہو رہا ہے، ان کی یہ پرفارمنس سعودی عرب کی پہلی گراں پری ریس کے انعقاد کے موقع پر طے شدہ ہے۔
Please, Justin Bieber, @justinbieber don’t perform for the regime that killed my fiance #justinbieber #saudiPawn https://t.co/dXM9XszvNG
— Hatice Cengiz / خديجة (@mercan_resifi) November 21, 2021
واشنگٹن پوسٹ کے سعودی صحافی جمال خاشقجی کو 2018 میں استنبول کے سعودی قونصل خانے میں بے دردی سے قتل کیا گیا تھا، وہ سعودی حکومت کے ناقد مانے جاتے تھے، ان کی منگیتر خدیجہ چنگیز اب بھی ان کے لیے انصاف کی طلب گار ہیں، اور وہ قتل کے بعد سے ولئ عہد محمد بن سلمان کے خلاف مہم چلا رہی ہیں۔
خدیجہ نے ان تین برسوں میں اس سلسلے میں ترکی، امریکا اور یورپی ممالک میں بہت ساری تقریریں کی ہیں، ان کا مؤقف ہے کہ جمال کے قاتلوں کے خلاف ابھی تک کوئی کارروائی نہیں ہوئی۔
