ٹوکیو : جاپانی حکومت نے رہائشی ویزا رکھنے والوں سمیت دس افریقی ممالک سے آنے والے غیرملکیوں کا جاپان میں دوبارہ داخلہ معطل کرنے کا فیصلہ کیا ہے، اس کی وجہ دنیا بھر میں پھیل رہی کورونا وائرس کی متغیر قسم اومی کرون ہے۔
مذکورہ دس ممالک میں جنوبی افریقہ، انگولا، زیمبیا، زمبابوے اور نمیبیا شامل ہیں۔ اس پابندی کا اطلاق کل بروز جمعرات سے ہو رہا ہے۔
غیر ملکی خبر رساں ادارے کی رپورٹ کے مطابق یہ نیا اقدام جاپان کی جانب سے منگل کے روز سے اصولی طور پر غیر رہائشی نئے غیر ملکیوں کے داخلے پر عالمگیر پابندی کے بعد سامنے آیا ہے۔
اضافی طور پر سویڈن، اسپین، نائجیریا اور پرتگال کو اُن علاقوں کی فہرست میں شامل کر لیا گیا ہے جہاں سے واپس آنے والے جاپانی شہریوں اور دیگر کو آمد کے بعد، گھر یا مقررہ مقامات پر تین دن قرنطینہ میں رہنا ہو گا۔
واضح رہے کہ اس فہرست میں اب 48 ممالک اور دیگر علاقہ جات شامل ہیں۔
