اسلام آباد: وزیر اعظم کے مشیر خزانہ شوکت ترین خیبر پختون خوا سے سینیٹر منتخب ہو گئے۔
تفصیلات کے مطابق غیر حتمی غیر سرکاری نتیجے کے تحت شوکت ترین کے پی کے سے سینیٹر منتخب ہو گئے ہیں، انھوں نے 87 ووٹ حاصل کیے۔
سینیٹ انتخاب میں کے پی اسمبلی کے 122 ارکان نے اپنا حق رائے دہی استعمال کیا، 13 ووٹ اے این پی اور 13 جے یو آئی کے امیدوار کو ملے، جب کہ شوکت ترین 87 ووٹ حاصل کر کے سینیٹر بن گئے ہیں۔
شوکت ترین نے اپنے بیان میں کہا کہ سینیٹر بننے پر سب سے پہلے اللہ کا شکر ادا کرتا ہوں، وزیر اعظم عمران خان، ارکان اور عوام کا بھی شکر گزار ہوں، بطور سینیٹر ہر مہینے میں کے پی میں آیا کروں گا۔
اپنے ووٹ کے بارے میں شوکت ترین نے کہا میرا ووٹ کراچی سے نہیں لاہور سے پشاور آیا، پشاور میں میرا سسرال ہے، داماد آدھا گھر والا ہوتا ہے، اس کی عزت کریں۔
بلدیاتی الیکشن میں شکست تسلیم کرتے ہیں، شوکت یوسفزئی
انھوں نے کہا کوشش ہے کہ کے پی کو ہائیڈل پاور کا نفع ملے، دہشت گردی کے خلاف جنگ میں کے پی سے بہت نا انصافی ہوئی، سینیٹر بن کر میں لگن سے کے پی کے لیے کام کروں گا۔
مہنگائی کی وجہ سے صوبہ خیبر پختون خوا میں بلدیاتی انتخابات ہارنے کے باوجود شوکت ترین نے کہا کہ مہنگائی صرف پاکستان میں نہیں پوری دنیا میں ہے، پیٹرول، خوردنی تیل، کوئلے کی قیمتیں دگنی ہوگئی ہیں، اس وقت دنیا میں 20 سال کی سب سے زیادہ مہنگائی ہے، لیکن چند ماہ میں پاکستان میں متوقع ہے مہنگائی کم ہوگی۔
