برلن : جرمنی میں ایک عجیب و غریب واقعہ پیش آیا جسے پڑھ کر آپ بھی حیرت اور مسکراہٹ کا مشترکہ طور پر اظہار کریں گے۔
جرمنی کے شہر میں دو خواتین کے مابین پالتو کتوں کی تربیت کے موضوع پر شروع ہونے والی بحث باقاعدہ لڑائی کی شکل اختیار کرگئی۔
مذکورہ واقعہ گزشتہ روز مشرقی جرمن ریاست تھیورنگیا کے چھوٹے سے شہر آئزیناخ میں پیش آیا۔ ایک27 سالہ خاتون اپنے پالتو کتے کے ساتھ ایک پارک میں چہل قدمی کر رہی تھی کہ اس نے دیکھا کہ ایک51 سالہ خاتون نے جو خود بھی اپنے پالتو کتے کے ساتھ اسی پارک میں موجود تھی کہ اچانک اپنے کتے کو پیٹنا شروع کردیا۔
یہ منظر دیکھ کر نوجوان خاتون نے اپنے سے زیادہ ادھیڑ عمر کی خاتون کو مخاطب کرکے اسے اپنے کتے کو پیٹنے سے روکنے کی کوشش کی تو دونوں خواتین کے مابین بحث شروع ہوگئی۔
27سالہ خاتون کا کہنا تھا کہ اس خاتون کو اپنے کتے کی تربیت کے لیے اسے پیٹنا نہیں چاہیے جبکہ بڑی عمر کی خاتون کا اصرار تھا کہ کتا اس کا اپنا ہے اور وہ جانتی ہے کہ اس کی تربیت کیسے کی جانی چاہیے۔
دیکھتے ہی دیکھتے یہ بحث باقاعدہ لڑائی کی شکل اختیار کرگئی اور دونوں خواتین نے اپنے کتوں کو چھوڑ کر ایک دوسرے سے ہاتھا پائی کرنا شروع کردی۔
اس حوالے سے پولیس نے میڈیا کو بتایا کہ لڑتے لڑتے بڑی عمر کی خاتون زمین پر گرگئی اور اس نے اپنے دانت اپنی کم عمر حریف کی پنڈلی میں گاڑ دیے، جس سے وہ زخمی تو ہوگئی مگر زمین پر گری ہوئی خاتون کو زور زور سے لاتیں مارتی رہی۔
پولیس نے اس واقعے کے بعد درج کی گئی ایف آئی آر میں لکھا ہے کہ اس لڑائی میں دونوں خواتین زخمی ہو گئیں جبکہ ان کے پالتو کتے پاس کھڑے انہیں خاموشی سے دیکھتے ہی رہے، دونوں کتے نہ تو آپس میں لڑے اور نہ ہی ان میں سے کسی نے اپنی مالکن کی حریف خاتون کو کاٹنے کی کوشش کی۔
پولیس کے مطابق اب ان دونوں خواتین کو اب ایک دوسرے کو جسمانی طور پر زخمی کرنے کے الزامات کے تحت عدالت میں پیش ہونا پڑے گا۔
