لاہور : لاہور میں اومیکرون کے 62 نئے کیسز سامنے آگئے ، جس کے بعد کیسز کی تعداد112 ہوگئی جبکہ ایک ہی خاندان کے 6افراد بھی وائرس کا شکار ہوگئے۔
تفصیلات کے مطابق پنجاب کے دارلحکومت لاہور میں اومیکرون کے کیسز میں تیزی سے اضافہ ریکارڈ کیا جارہا ہے ، شہر میں اومی کرون کے 62 نئے کیسزسامنے آگئے ہیں۔
محکمہ صحت کا کہنا ہے کہ لاہورمیں اومیکرون کے کیسز کی تعداد112 جبکہ صوبے بھر میں اومی کرون کےکیسز کی کل تعداد117ہوگئی ہے۔
محکمہ صحت کے مطابق ایک ہی خاندان کے6افرادبھیاومیکرون کا شکارہوگئے، اومی کرون وائرس بہت تیزی سےپھیل رہاہے،اومی کرون وائرس پھیلنےکی شرح ڈیلٹاویرینٹ سے بھی زیادہ ہے۔
دوسری جانب اومیکرون کے بڑھتے کیسز پر اظہار تشویش کی قرارداد پنجاب اسمبلی میں جمع کرادی گئی ہے ، قرارداد مسلم لیگ(ن) کی رکن سعدیہ تیمور کی جانب سے جمع کرائی گئی۔
قرارداد کے متن میں کہا گیا ہے کہ لاہورمیں اومیکرون کے77کیسزرپورٹ ہوناتشویشناک ہے، شہری احتیاطی تدابیر کو ہرگز نظر انداز مت کریں۔
قرارداد میں مطالبہ کیا ہے کہ حکومت اومی کرون سے متعلق ہنگامی بنیادپرآگاہی مہم شروع کرے۔
خیال رہے پاکستان میں کورونا کیسز میں اضافہ ہونے لگا ہے اور مثبت کیسز کی شرح بڑھ کر ایک اعشاریہ پانچ پانچ فیصد ہوگئی، این سی او سی کے مطابق گزشتہ روز پینتالیس ہزار چھ سو تینتالیس افراد کے کورونا ٹیسٹ کئے گئے، جس میں سے سات سو آٹھ نئے کیسز رپورٹ ہوئے۔
