ریاض: سعودی وزارت صحت کے ترجمان ڈاکٹر محمد العبد العالی نے وضاحت پیش کی کہ مملکت میں پھر سے لاک ڈاؤن کا امکان نہیں ہے۔
مقامی میڈیا کو دیے گئے انٹرویو میں ترجمان سعودی وزارت صحت کا کہنا تھا کہ وبا کے آغاز میں جس طرح کی صورت حال پیدا ہوئی اب اس کا دوبارہ امکان نہیں ہے، سعودی عرب میں لاک ڈاؤن نہیں لگ رہا۔
انہوں نے بتایا کہ شہری آپس میں لاک ڈاؤن کے حوالے سے گفتگو کررہے ہیں کیوں کہ مملکت میں وبائی کیسز میں اضافہ دیکھا گیا لیکن ملک کو پھر سے بند نہیں کریں گے۔
ڈاکٹر محمد العبد العالی کا کہنا تھا کہ وائرس سے متاثرہ افراد کی زیادہ تعداد ان لوگوں کی ہے جنہوں نے یا تو ویکسین نہیں لی یا وہ مطلوبہ خوراکیں اور بوسٹر ڈوز سے کترا رہے ہیں۔
ترجمان نے یہ بھی کہا کہ سعودی عرب کی بڑی آبادی ویکسین لے کر مدافعتی نظام مضبوط بنا چکی ہے اور مؤثر ویکسینز وافر مقدار میں مہیا ہیں۔
ان کا کہنا تھا کہ شہریوں میں ویکسینیشن کے حوالے سے آگاہی بھی پیدا ہوچکی ہے۔
العبد العالی نے اپنی گفتگو مکمل کرتے ہوئے کہا کہ مذکورہ حقائق کی روشنی میں وبا کے پہلے مرحلے جیسی صورتحال پیدا نہیں ہوسکتی، لہذا لاک ڈاؤن کی بات غلط ہے۔
