قاہرہ: مصری عدالت نے اخوان المسلمین کے 10 ارکان کو سزائے موت سنا دی۔
بین الاقوامی نیوز ایجنسی روئٹرز کے مطابق مصر کی ایک عدالت نے حملوں کی منصوبہ بندی کے الزام میں 10 افراد کو سزائے موت سنا دی۔
مصری سرکاری نیوز ایجنسی نے اتوار کو بتایا کہ جن افراد کو سزائے موت سنائی گئی ہے ان کا تعلق کالعدم اخوان المسلمون سے ہے، جن پر پولیس پر حملوں کی منصوبہ بندی کا الزام تھا۔
خبر میں کہا گیا ہے کہ ان دس افراد کو قاہرہ کے جنوب میں واقع شہر حلوان میں ‘حلوان بریگیڈز’ کے نام سے مسلح گروپ بنانے کا قصوروار پایا گیا۔
خبر کے مطابق مصر کی اعلیٰ مذہبی اتھارٹی، مفتی اعظم کو ان سزاؤں کی توثیق کرنی ہوگی، نیز، ملزمان کی شناخت ظاہر نہیں کی گئی ہے، اور یہ معلوم نہیں ہو سکا ہے کہ انھوں نے الزامات قبول کیے یا نہیں۔
واضح رہے کہ مصر نے اخوان کے خلاف اپنی جدید تاریخ کا سب سے بڑا کریک ڈاؤن شروع کیا ہوا ہے، جس کا آغاز 2013 میں ملک کے پہلے آزادانہ طور پر منتخب ہونے والے اسلام پسند صدر محمد مرسی کی حکومت کے خلاف بڑے پیمانے پر مظاہروں کے بعد فوج کے ہاتھوں تختہ الٹنے کے بعد ہوا۔
مصری حکومت نے اخوان کو دہشت گرد تنظیم قرار دیا ہے، دوسری طرف اخوان ایک عرصے سے کہتے آ رہے ہیں کہ وہ پُر امن تبدیلی پر یقین رکھتے ہیں۔
سرکاری نیوز ایجنسی مینا نے قاہرہ کے جنوب میں واقع شہر کے حوالے سے کہا کہ جن 10 افراد کو موت کی سزا سنائی گئی ہے، انھوں نے "حلوان بریگیڈز” کے نام سے ایک گروپ تشکیل دیا تھا، اور وہ قاہرہ کے علاقے میں پولیس کے اہداف پر حملہ کرنے کی ایک وسیع سازش کا حصہ تھے جس کا مقصد حکومت کو گرانا تھا۔
