سیاسی عدم استحکام کے شکار مغربی افریقی ملک گنی بساؤ میں ممکنہ فوجی بغاوت کی کوشش میں 2 افراد کے ہلاک ہونے کی اطلاعات ہیں۔
خبر رساں ادارے کے مطابق دارالحکومت بساؤ میں صدارتی محل کے قریب شدید فائرنگ کی آوازیں سنائی دی گئی ہیں اور مسلح جھڑپ میں ہلاکتوں کا خدشہ ظاہر کیا گیا ہے۔
مقامی ذرائع کا کہنا ہے کہ صدارتی محل پر فوج نے حملہ کیا ہے جس کے ردعمل میں صدارتی محل کے محافظ بھی بھرپور جوابی کارروائی کر رہے ہیں۔
محل پر حملہ ایسے وقت میں ہوا ہے جب صدر کی زیرصدارت کابینہ کا اجلاس جاری تھا۔
خبرایجنسی کا کہنا ہے کہ دوطرفہ فائرنگ کے تبادلے میں جانی نقصان کی اطلاعات موصول ہوئی ہیں، اب تک 2 افراد کے ہلاک ہونے اور کئی کے زخمی ہونے کی خبریں سامنے آئی ہیں۔
سیاسی عدم استحکام نے ملک کو کئی دہائیوں سے تباہ کر رکھا ہے۔ 1974 میں پرتگال سے آزادی کے بعد سے نو بغاوتوں یا بغاوت کی کوششوں نے معیشت کو شدید نقصان پہنچایا ہے۔
